Nafarroako Gobernuak, Nasuinsa sozietate publikoaren bidez, 4,1 milioi euro bideratu ditu Urdiain-Altsasu poligonoko urbanizazio-lanak hasteko. Industria-inguruko proiektua Urdiain udal barrutian hasiko da garatzen, lehenengo fasea gauzatuta, 169.345 m2-ko azaleran. Urdiain-Altsasu poligonoa lehentasunezko jarduna da Foru Komunitatean azpiegitura publikoak bultzatzeko Nafarroa 2012 Planaren barruan, eta horri esker, Sakanan eskualde-esparruko jarduera ekonomikoen inguru berria sortuko da.

Aurretik ere iragarrita zegoen moduan, Urdiain-Altsasu poligonoa faseka eraikiko da eta poligonoa gauzatzeko lanak egon dagoen industria-lurzoruaren eskaerara egokituko dira, enpresa-proiektu berriei albait ondoen erantzuteko. Modu horretan, lizitazioan atera den lehenengo fasearen urbanizazioak 169.345 m2-ko azalera hartzen du, hau da, Urdiain inguruan kokatutako poligonoaren azaleraren %26. Lehenengo fase honetan, industria-lursailen 90.924 m2 eskuragarri daude. Poligonoaren urbanizazioaren lehenengo fasean neurri desberdinetako lursailak planteatu dira, enpresa txikiak, ertainak eta handiak hartu ahal izateko.

Lizitazio eta esleitze fasea osatu ondoren, lanak gauzatzeko hasierako epea 10 hilekoa izango da. Lizitazio-prozesua joan den astelehenean hasi zen, eta interesa duten lan publikoen enpresentzat eskaintzak aurkezteko epea irekita dago, datorren apirilaren 15era arte. Nasuinsak esleituko duen proiektuaren barruan, lurrak mugitu, drainatzea, zoruak eta zoladurak, saneamendua eta hornikuntza, hornikuntza elektrikoa, argiteria, telefonoa eta telekomunikazioak, seinaleak eta balizak jarriko dira. Urdiain-Altsasu Nafarroako Gobernuko Berrikuntza, Enpresa eta Lan Departamentuak 2008tik industria-lurzorua sustatzeko egingo duen lanik garrantzitsuena da. Horrekin batera, Nasuinsak milioi 1 euroren truke Lodosako industria-poligonoaren lehenengo fasearen urbanizazioa lizitazioan atera du.