Gaur aurkeztutako datuen arabera, Ogasunaren ustez, Errentaren Kanpainan 224 milioi itzuliko zaizkie zergadunei. Kopuru horretatik 77,5 milioi bihar, osteguna, apirilak 7, sartuko dira aitorpen-proposamena etxean jaso dutenen kontuetan (itzuli beharreko kopuru osoaren %34,6). Horrez gain, Ogasunak, uztailaren 1a baino lehen, itzuleren %90 egiteko konpromisoa hartu du. Hori dela eta, Ogasunak apirilaren 7tik uztailaren 1era itzuliko duen kopurua 201,6 miloi eurokoa izango da.

Bestalde, Ogasunak kanpaina honetan jasoko duen zenbatekoa, hau da, ordaintzea egokitzen zaien aitorpenen zenbatekoa, 110 milioi eurokoa da. Kopuru hori bi epetan ordaindu daiteke (uztailaren 4an eta azaroaren 18an).

Modu horretan, 2010eko Errentaren Kanpainak 114 milioi euroko saldo negatiboa eragingo du foru-kutxetan.

2010eko Errentaren Aitorpenean hainbat neurri fiskal aplikatuko dira, besteak beste: %18ko aurrezkiaren tributazioa mantentzea 6.000 eurokoak baino txikiagoak diren errenten kasuan (zergadunen %93), 2009an indarrean sartu zen neurria, eta tributazioa %18tik %21era handitzea 6.000 eurotik gorako errenten kasuan. Lan-errendimenduen kasuan, tributaziotik salbuetsita dago enpresa berean berriro ere kontratatzen dituzten langileak kaleratzearen ondoriozko kalte-ordaina, eta langileen lantokirako garraio kolektiboa ez da hartuko gauzaz egindako ordainketa moduan. Horrez gain, 2010eko zergaldirako, enplegua sortzearen ondoriozko dedukzioa %30 handitu da. Krisiaren aurkako neurrien barruan, tributaziotik salbuetsita daude laguntza publiko hauek: Renove Hogar 2010; Renove Auto Navarra 2010; Turismo-ibilgailuak eta ibilgailu astunak puntuan jartzea; etxeko zerbitzurako eta adingabeen, adinekoen eta mendeko moderatuen akonpainamendurako pertsonak kontratatzeko laguntzak; eta "Ekintzailearen Beka" programa. Etekin garbia zehaztearen esparruan, moduluen arabera tributatzen duten nafarrek, batez ere nekazariek eta abeltzainek eta autonomoek, sektoreari laguntzeko onetsitako moduluen beherapen orokorretatik onurak lortuko dituzte: %5 enpresa-jardueretarako eta %12 nekazaritza- eta abeltzaintza-jardueretarako.

Zergadunen ezaugarriei dagokienez, errentaren aitorpena aurkeztu behar dute 2010ean 11.250 euro gordineko laneko etekinak edo handiagoak lortu zituztenek; kapital higigarriaren etekinak eta ondare-handikuntzak, 1.600 euro gordineko atxikipena edo handiagoa dutenak; beste errenta batzuk jasotzen dituzten zergadunak (enpresaburuak eta profesionalak, errentatzaileak, etab.), eta edonola ere, aitorpen bateratua egitea hautatzen bada.

Nafarroako Ogasunak egindako txosten soziometrikoen arabera, zerga-zamarik handiena likidazio-oinarri handienak dituzten zergadunek jasaten dute. Modu horretan, 2009ko datuak erreferentzia moduan hartzen badira, 24.000 eurotik gorako errentak dituzten zergadunek, kopuru osoaren %29k, PFEZren %81,6 jasaten dute.

Iazko Errentaren Kanpainako datuei erreparatuz, zergadunek aplikatzen dituzten dedukzio eta murrizketa nagusiak hauek dira: beherapen fiskala seme-alabengatik, 154.716 nafar ukitu zituena, 292,34 milioi eurorekin; dedukzioa lanarengatik, 298.276 onuradunekin eta 306,36 milioi eurorekin; dedukzioa etxebizitzarengatik 111.686 nafarrek aplikatu zuten eta 138,74 milioi eurokoa izan zen; eta alarguntasun-pentsioen ondoriozko dedukzioa, 11.269 onuradunekin eta 9,8 milioi eurorekin.