Nafarroako Gobernuak, Berrikuntza, Enpresa eta Lan Departamentuaren bidez, etxetresnen Renove Planaren edizio berria jarri du abian, 505.000 euroko aurrekontuarekin. Neurri horren bidez, etxebizitzetan energia elektrikoaren kontsumoa murriztu nahi da, etxetresna zaharren ordez berriak ipinita; horrez gain, herritarrak energiaren erabilera eraginkorraren inguruan kontzientziatu nahi dira.

Etxetresnen Renove Planaren edizio honetan energia-kalifikaziorik handienak dituzten tresnak soilik lagunduko dituzte diruz. Hozkailuen, konbien eta izozkailuen kasuan, A++ energia-klasea edo handiagoa dutenek, 125 euroko diru-laguntza izango dute; gainerako etxetresnen kasuan (arropa-garbigailuak, ontzi-garbigailuak eta lehorgailuak), A eta A+ energia-klasekoek 105 euroko laguntza jasoko dute. Horrez gain, indukzioko sukaldeak erostea diruz lagunduko da, gaineko sukalde elektriko konbentzionala edo bitrozeramika aldatzea badakar.

Laguntzak eskatzeko epea datorren apirilaren 14an hasi eta 2011ko urriaren 31n amaituko da, edo ezarritako aurrekontua agortzen denean. Aipatutako epearen aurreko fakturak ez dira onartuko. Hala ere, data horren aurretik funtsak amaitzen badira, eskaera-epea azken etxetresna saltzeko unean amaituko da.

Diru-laguntzak emateko ebaluazio indibidualizatua egingo da. Modu horretan, espedienteak eskaerak aurkezteko ordenaren arabera izapidetu eta ebatziko dira, horretarako behar den besteko aurrekontu-kreditua dagoen bitartean.