Nafarroako Gobernuak, gaurko saioan, 944.900 euroko gastua baimendu du 40 urtetik beherako nekazari gazteen ezarpen berriak diruz laguntzeko. Gastua 2011 eta 2013 urteetan gauzatuko da, 489.879 eta 455.020 euro hurrenez hurren. Gastua izapidetzeko dauden laguntza-eskaerei erreparatuz aurreikusi diren beharrei erantzuteko baimendu da.

Nekazari gazteak ezartzeko laguntzen programa Nafarroako Landa Garapeneko Planaren (2007-2013) barruan indarrean dago eta 1. ardatzari dagokio, nekazaritza-sektorearen lehiakortasuna handitzea jomuga duena. Laguntza ekonomiko horiek Nafarroako Gobernuak (%84) eta LGENF Europako funtsek (%16) finantzatzen dituzte.

Nekazari gazteentzako laguntzak 40 urtetik beherako pertsonei bideratuta daude, nekazaritza-ustiategi batean titular moduan edo titularkide moduan ezarri nahi badute. Bi laguntza-modalitate ezarri dira: nekazaritza-ustiategi batean nekazari nagusi moduan ezartzeko 40.000 euroko prima bakarra ematen da gehienez edo 40.000 €-ko interes-hobaria gehienez, edo bien arteko konbinazioa, gehienez 70.000 euro emanda. Instalazioko titular nagusia ez bada, 24.000 euroko prima bakarra ematen da. Laguntza diruz laguntzeko moduko inbertsioaren %40ra artekoa izan daiteke (%50ekoa, ustiategia beharrizana duen inguru batean badago).