Inguratzaile termikoetan egingo diren jardunen barruan, eraikin horien fatxadak eta teilatuak eraikuntzaren gaur egungo kode teknikora egokituko dira, isolatze termikoari dagokionez. Zehatz esanda, fatxadak kanpoaldetik isolatuko dira, leiho bikoitzak jarriko dira igorpen urriko eta eguzki-kontroleko beirekin, teilatuak berritu eta isolatuko dira eta behe-solairuetako etxebizitzak isolatuko dira. Inguratzaile termikoa zaharberrituko den atari gehienetan igogailuak jarriko dira oztopo arkitektonikoak kentzeko, eta eraikineko instalazio orokorren zati bat berrituko da. Jardun horiek zortzi ataritan egingo dira: Rafael Delgado Garcés, 12 (18 etxebizitza), Rafael Delgado Garcés, 10 (18 etxebizitza), Rafael Delgado Garcés, 8 (18 etxebizitza), Rafael Delgado Garcés, 6 (18 etxebizitza), Manuel Robles Pintado, 5 (8 etxebizitza), Caparroso Paños, 11 (18 etxebizitza), Caparroso Paños, 3 (18 etxebizitza), Clemos Burgaleta, 3 (6 etxebizitza). Atari horretan ez da igogailua sartzen, eraikinak behe-solairua + 2 solairu baititu.

Diru-laguntza erkidego horietako etxebizitzen azaleraren modu proportzionalean banatuko da, eta ezin du gainditu energia-birgaitzearen kostuaren %22.

Tuterako Lourdes auzoan 8.600 pertsona bizi dira eta 2.000 etxebizitza baino gehiago ditu. Isolamendu termikoaren arloko konponbideez gain, Ecocity - Lourdes Renove jardunean, 50eko eta 70eko hamarkaden artean eraikitako tipologia desberdinetako etxebizitzak barruan hartzen dituen horretan, berogailuan energia berriztagarriak erabiltzea aurreikusi da.

Energia-aurrezkiaren arloan Espainian dagoen araudiko betekizunak gainditzen dituzten etxebizitzen zaharberritze bakarra da Nafarroan. Horrez gain, Europako Batzordeko I+G Esparru Programetako funtsak dituen bakarra da.

Birgaikuntzak hiru lan-ildo ditu: isolamendu termikoa hobetzea, etxebizitzen inguratzaile termikoetan jardunak eginez berogailu-beharrizana murrizteko; instalazio termikoen energia-efizientzia hobetzea, 486 etxebizitzari zerbitzua ematen dion berogailu-instalazio zentralizatua eta horren banaketa-sareak berrituz; eta energia berriztagarriak erabiltzea berogailu zentralizatua berritzearen bidez. Jardun horretan, banaketa-sare osoa ordezteaz eta monitorizazio-osagaiak gehitzeaz gain, energia berriztagarriaren iturri berria gehituko da, biomasa. Horrek etxebizitza hauek eskatutako energiaren %80 ekoitziko du gutxi gorabehera; gainerako energia gasarekin sortuko da, eta, era berean, gas-galdaren sala osorik berrituko da. Gaur egun, biomasa-galdaren sala amaituta dago, eta maiatzaren 2tik aurrera, berogailu-zerbitzuak funtzionatzeari uzten dionean, etxebizitzen barruan zein gas-galdaren salan lanak hasiko dira. Sala horrek ez du gaur egungo kokapena aldatuko.

Lourdes Renove proiektuak Europako Concerto programaren barruko Ecocity proiektua osatzen du. Horretan parte hartzen dute Nafarroako Gobernuak, Berrikuntza, Enpresa eta Enplegu Departamentuaren bidez; Tuterako Udalak; Energia Berriztagarrien Zentro Nazionalak (CENER); Centro Nacional Integrado de Formación en Energías Renovables (CENIFER) zentroak; Zabala aholkularitzak; Erriberako ORVE bulegoak eta Nasursak.