MODERNA Fundazioaren Batzorde Iraunkorra

Nafarroako Gobernuak, joan den martxoaren 9an, MODERNA Plana jarri zuen abian plan horren garapena kudeatuko duten Fundazioa eta partzuergoa eratzeko eta aurkezteko ekitaldian. Egun hartan MODERNA Fundazioaren partzuergoaren lehen bilera egin zen eta Mª José Ballarín Domeque izendatu zuten Fundazioaren presidenteorde. Fundazioaren Batzorde Iraunkorreko 19 kideak ere izendatu zituzten. Gaur batzordea eratu eta lehen bilera egin dute.

Batzorde Iraunkorra hemeretzi kidek osatzen duten kide anitzeko organoa da. Kide horietako bi Nafarroako Gobernuak izendatu ditu eta horietatik bat Batzordeko presidentea da. Zehazki, joan den apirilaren 18an, Gobernuak MODERNA Fundazioaren Batzorde Iraunkorreko ordezkari gisa Álvaro Miranda Simavilla bigarren presidenteordea eta Ekonomia eta Ogasun kontseilaria (Batzordean ere presidentea izango da) eta Alberto Catalán Higueras Hezkuntza kontseilaria eta erakundeekiko harremanetarako kontseilaria eta Gobernuaren eleduna izendatzea erabaki zuen.

Batzordeko beste bi kide Nafarroako Parlamentuak izendatutako bost nagusien artean aukeratu dituzte. Bestalde, zazpi kide erakunde sustatzaileetako ordezkari gisa aukeratu dituzte: bi kide politikaren alorrekoak dira (UPN eta PSN), beste bi hezkutzaren alorrekoak (UPNA eta NU), beste bi sindikatuetakoak (UGT eta CCOO) eta beste bat enpresen arlokoa (CEN). Enpresetako nagusien eta profesionalen artean zazpi kide aukeratu dituzte eta, azkenik, Fundazioaren presidenteordea kide naturala eta Batzorde Iraunkorreko presidenteordea da.

MODERNA Plana, Nafarroako garapen ekonomikorako eredu berria

Fundazioa eratu eta MODERNA Plana abian jarri ondoren amaitu zen 2008an egiten hasi ziren plan estrategikoa. Honako hauek izan dira plan estrategikoaren sustatzaileak: UPNren Nafarroako Gobernua, PSN, Nafarroako Enpresaburuen Konfederazioa, UGT eta CCOO sindikatuak eta Nafarroako bi unibertsitateak, Nafarroako Unibertsitate Publikoa eta Nafarroako Unibertsitatea. Horiez gain, bi urte baino gehiagoz 5.000 lagun baino gehiagoren ekarpenak bildu dituzte.

Moderna Plana 2010eko ekainaren 21ean onetsi zuten erakunde sustatzaileek. Bestalde, Nafarroako Gobernuak ekainaren 28an onetsi zuen Plana eta, ondoren, Nafarroako Parlamentuak onetsi zuen 2010eko urriaren 1ean egindako osoko bilkuran % 76ko babesa izanik. UPN, PSN, CDN eta IUren aldeko botoak jaso zituen eta NaBairen kontrakoa.

MODERNA Planaren asmoa datozen hogei urteetan Nafarroako garapen ekonomikoaren ereduaren aldaketa sustatzea da osasunaren ekonomia, ekonomia berdea eta talentuaren ekonomia oinarri hartuta. Nafarroa da Espainian ezaugarri horiek dituen plana abian jarri duen lehenengo autonomia erkidegoa. Plana egiteko funtsezkoak izan dira herritarren partaidetza eta instituzioen adostasuna eta hala izango dira plana garatzeko ere. Nafarroan ekonomia berri bat sustatzea du helburu planak eta, horretarako, datozen hogei urteetan foru erkidegoak bete beharreko erronkak, metodologia eta ardatz nagusiak zehazten ditu, baita esparru bakoitzerako helburu zehatzak eta 458 ekintza ere.

Hauexek dira Moderna Planaren helburu nagusiak: oparotasun handiagoa lortzea eta, hala, Nafarroa biztanleko BPGren eta aberastasunaren bidezko banaketaren Europako eskualdeen zerrendan hasierako hogei eskualdeen artean izatea, giza garapen handiagoa lortzea eta Nafarroa, Giza Garapenaren Adierazleari (GGA) dagokionez, Europako lehen hamar eskualdeetako bat izatea, horretarako kalitate handieneko osasun laguntza eta hezkuntza sistema bikaina eskainita eta ingurumenaren iraunkortasuna areagotzea eta parametro horretan Nafarroa Europako lehen hogei eskualdeetako bat izatea.