Nafarroako Gobernuak baimena eman dio Herri Lan, Garraio eta Komunikazio Departamentuari Cadreita-Alesbes azpitarteko trenbide-plataforma eraikitzeko lizitazio publikoa egiteko. Lan hori Nafarroako lehenengoa izango da Abiadura Handiko Korridore Kantabriar-Mediterraneoaren barruan. Kontratua egiteko, gehienez 42,4 milioi euro finkatu dira eta betearazpen epea 28 hilabetekoa izango da.

Miguel Sanz Nafarroako Lehendakariak, Gobernuaren saioaren ostean egindako prentsaurrekoan, gaurkoa "egun garrantzitsua" dela esan du, izan ere, "akordio honi esker uztailean korridoreko lanak hasiko dira eta, beraz, Nafarroak historia osoan Estatuko obra publikoan egindako inbertsiorik handiena abiatuko da. Horrez gain, Lehendakariak esan duenez "AHT atzeraezina da gure Komunitatean".

Sanzek azpimarratutakoaren arabera, akordio hau Estatuko Administrazio Orokorraren, ADIFen eta Foru Komunitateko Administrazioaren artean korridorea eraikitzeko hitzarmenak sinatu zirenetik urtebete eskas igaro denean lortu da, "guk proposatutako helburuak betez". "Gure helburuei dagokienez –Nafarroakoei aipamen eginez- guztiak beteta daude", esan du.

Gobernuaren akordioaren ostean, kontratazio-espedientea abiatuko da, Herri Lan, Garraio eta Komunikazio kontseilariak gaur bertan sinatuko duen foru-aginduaren bidez. Testua aste honetan argitaratuko da Europar Batasuneko Aldizkari Ofizialean eta Nafarroako Gobernuaren kontratazio-atarian, eta bertan egongo da 40 egunez. Epe hori amaitu ondoren, aurreikuspenen arabera, lanak esleitu eta abiatuko dira.

42.426.854,31 euroko gastua honela banatuko da hurrengo aurrekontu-ekitaldietan: 5 milioi 2011ko gastuen aurrekontuaren kargura; 20 milioi 2012an; eta gainerakoa, 17.426.854,31 euro, 2013an.

Gogoan izan behar da Nafarroako Gobernuak, Gobernu Zentralarekin sinatutako konpromisoen arabera, Castejón-Iruñerria tartea garatu eta bultzatu behar duela, Zaragoza-Iruñea Abiadura Handiko Linearen barruan. Tarte hori zatitu egin da proiektuak eta obrak egiteko, azpitarte hauetan: Castejón–Alesbes, Alesbes–Erriberri, Erriberri–Tafalla, Tafalla–Campanas eta Campanas–Ezkirotz.

Era berean, Castejón-Alesbes azpitarteko oinarrizko proiektua, 14,775 kilometroko luzerakoa, bitan zatitu da lizitazioari begira: Castejón-Cadreita, 6,195 kilometrokoa, eta Cadreita-Alesbes, 8,58 kilometrokoa. Azken tarte hori da Foru Gobernuak gaur lortutako akordioari lotutakoa.