Miguel Sanz Sesma Nafarroako Lehendakariak adimen-desgaitasuna duten pertsonei laguntzen dien Nafarroako Anfas elkarteko ordezkaritza zabala hartu du gaur goizean Nafarroako Jauregiko Tronu Aretoan, entitatearen 50. urteurrena dela eta. Ordezkaritzaren buru Uxue Zulet Jurío lehendakaria izan da. Sanz Lehendakariaren alboan María Isabel García Malo Familia, Gazteria, Kirol eta Gizarte Gaietako kontseilaria egon da.

Gaur egun, Elkartea 2.600 bazkidek osatzen dute. 1.000 bazkide inguru familiakoak dira, eta gainerakoak bazkide osoak. 60 pertsona baino gehiago kontratatuta ditu eta aldi baterako kontratuak egiten dira arnasa hartzeko, oporretako eta udako aisia programetarako. Horrez gain, 500 boluntariok entitatearen helburuak betetzen laguntzen dute.

Desgaitasuna duten pertsonentzako eta horien familientzako programa eta zerbitzuen barruan, hurrengoak sartzen dira: arreta goiztiarra, oporrak, psikomotrizitatea eta musikoterapia, kirolak, informatika, etxebizitza eta bizitza autonomorako trebetasunak. Besteak beste, elkartea Tasubinsa enpresaren titularra da. Enpresa 1990ean sortu zen eta industria-azpikontratazioan aritzen da hainbat arlotan, esaterako plastikoen injekzioa eta apainketa, muntaketa elektronikoak eta elektrikoak, muntaketak automoziorako eta kableak, eta eraikinak eta azpiegiturak kontserbatzea eta gune berdeak mantentzea. Horren bidez, adimen-desgaitasuna duten pertsonentzako enplegua sortzen da.