Amelia Salanueva Murguialday Nafarroako Gobernuko Toki Administrazio kontseilariak eta José Antonio Gayarre Bermejo Nafarroako Errege Bardeetako Erkidegoko lehendakariak lankidetza-protokoloa sinatu dute gaur goizean, Erronkari eta Zaraitzu ibarretako 19 udalerri eta La Oliva monasterioa barruan hartzen dituena. Ekitaldia Nafarroako Gobernuaren prentsa-aretoan egin da eta bertara Toki Administrazioko zuzendari nagusia eta Julián Isla eta José Luis Carrica Errege Bardeetako Batzordeko kideak joan dira.

Protokolo horren bidez, Toki Administrazio departamentuak Bardeetako esparru juridiko-ekonomikoan eta teknikoan laguntza eta lankidetza sustatu eta emateko konpromisoa hartzen du, baita teknologia, metodologia eta toki kudeaketako eredu berriak ezartzeko lankidetza ere, besteak beste, akreditazio-txartelen sistema.

Horrez gain, dokumentuaren arabera, gaur egungo 2009-2012 Toki Inbertsioen Planetan Foru Komunitateak aldi honetan Errege Bardeetan egindako inbertsio batzuk sartzeko aukera dago, baita entitate horrek etorkizunean egin ditzakeenak ere, xedea oinarrizko azpiegituren garapena izanda (hornikuntza, saneamendua, arazketa, etab.). Protokoloan Bardeekin departamentu arteko batzordea sortzeko aukera ezarri da, elkarrekin jorratu behar diren gaietarako.

Amelia Salanueva kontseilariak azaldu duenez, Foru Gobernuaren eta toki entitate horren arteko lotura ona zen arren, beharrezkoa zen bien arteko lankidetzari "eduki gehiago ematea" Errege Bardeetan garapen berriak sustatzeko, inguru horretako berezitasunei ere eutsiz. "40.000 hektarea hauek kudeatzeko, erkidegoa osatzen duten 22 kideekin jardun berezituak egin behar dira, beste toki entitate bat balitz bezala", esan du kontseilariak.