Gaztaren arloko erkidego birtuala garatzea: Nafarroara bideratutako aurrekontua: 36.000 euro. Proiektu hau Kataluniarekin batera aurkeztu da Kantauri eta Pirinio aldeko gazta-ekoizleen artean lankidetza-sare birtuala sortzeko, ekoizleek negozioak hedatzeko informazioa, trebakuntza eta zerbitzu teknologikoak izan ditzaten. Horretarako, foro birtuala sortu nahi da, eta horretan ekoizleek haien esperientziak azaldu, lanaren garapenari buruzko iritziak formulatu eta taldeko beste kide batzuei balizko konponbideak emango dizkiete.

Promoagro 2.0. Nafarroara bideratutako aurrekontua: 200.000 euro. Proiektu honen ardura Nafarroako Gobernuarena da eta Fundagrok egingo du. Xedea eskualde arteko web plataforma garatzea da, dibulgazioaren, hezkuntzaren, sutapenaren eta lankidetzaren arloko zerbitzuak eta baliabideak integratzeko, nekazaritza-jardueraren eta landa-inguruko balioen zabalkunderako eta gizarte-balioespenerako.

Nekazaritza-erabilera zehatzen kartografia egitea. Nafarroara bideratutako aurrekontua: 72.000 euro. Proiektu hau Asturiasekin batera aurkeztu da. Horren bidez, nekazaritza- eta baso-ikuspuntutik lurzorurik interesgarrienak zehaztu nahi dira, horien kontserbazioari lehentasuna emateko.

Nekazaritzako elikagaien sektorean balio-kateak optimizatzea: bizi-zikloaren analisia eta karbonoaren aztarna. Nafarroara bideratutako aurrekontua: 63.247 euro. Mundu osoan, berotegi-efektuko gasen isurketen %13,5 nekazaritzatik eta abeltzaintzatik datozela kontuan hartuta, Nafarroaren eta Euskal Autonomia Erkidegoaren proiektu honen bidez hiru prozesuren bizi-zikloa aztertu nahi da: abeltzaintzako pentsuak egiten direnetik esnekiak egiten diren arte; zerealak ustiatzen direnetik irinak egiten diren arte, eta zerealak ustiatzen direnetik garagardo-malta egiten den arte. Xedea prozesu horietan zuzenean edo zeharka berotegi-efektuko zenbat gas isurtzen diren jakitea da, baliabideak ateratzen direnetik hondakinak azken jomugara bidali arte.

Esnetarako ardien ustiategiak berritzea horien lehiakortasuna hobetzeko. Nafarroara bideratutako aurrekontua: 45.000 euro. ITG Ganadero de Navarra izenekoak eta Gaztela eta Leongo Nekazaritza Institutu Teknologikoak proiektu honetan elkarrekin lan egiten dute. Xedea esnetarako ardien ustiategien errentagarritasuna, jasangarritasuna eta lehiakortasuna hobetzea da. Horretarako, esperientzia pilotu batzuk egingo dira, hurrengo hauei lotuta: ardien elikadura, garbiketa-jardueretan ur elektrolizatua erabiltzea, energia aurrezteko neurriak ezartzea eta ustiategiak kudeatzeko oinarrizko programak garatzea.

Landutako bioaniztasuna berreskuratu eta erabiltzea balio erantsi handiko elikadura-produktuak egiteko. Nafarroara bideratutako aurrekontua: 44.820 euro. Proiektu honetan Nafarroak, Asturiasek, Balear uharteek eta Kataluniak parte hartzen dute. Abiapuntuak natura-produktuen aldeko interes gero eta handiagoa eta gariaren barietate tradizionalekin egindako ogi mota tradizionalak berreskuratzea dira. Proiektuan eskualde bakoitzean dauden zereal honen barietateak eta horiekin balio erantsi handiko ogi motak egiteko bideragarritasuna aztertzen dira.

Autonomia-erkidegoetan landa-inguruaren garapen jasangarrirako lurzoruei buruzko informazioa harmonizatzeko ibilbide-orria. Nafarroara bideratutako aurrekontua: 70.000 euro. Espainian, lurzoruari buruzko informazioa zatika lortu da, hainbat irizpide erabiliz. Orain, Europako Inspire zuzentarauak eskatzen du informazio hori bateragarria izatea eta, beraz, beharrezkoa da harmonizatzea. Proiektua Tracasa enpresa publikoaren ekimena da, esperientzia handia baitu kartografia egiten eta Inspire zuzentarauaren Europako adituetako bat baitu. Proiektua Aragoin, Asturiasen, Katalunian, Errioxan, Galizian, Gaztela-Mantxan, Extremaduran, Valentzian, Balearretan eta Gaztela eta Leonen aplikatuko da.