Laguntza-neurrien helburua da, bilketa ez egiteagatik edo uzta berdean egiteagatik (heldu gabeko produktua) burututako operazioak konpentsatzea; horrekin batera, bildutako barazkiak doan banatzeko operazioak erraztea Nafarroako Elikagaien Bankuaren bidez, edo beste azpiproduktu batzuk lantzea eta gizakiek jateko ez direnak (ganaduaren elikagaia, konposta, bioerregaiak edo biodegradazioa lursailean, besteak beste). Nolanahi ere, doako banaketa hori Landa Garapeneko Departamentuak Elikagaien Bankuarekin lan egiten duten ongintzako erakundeen artean egingo da lehendabizi (70 inguru), kalitatezkoak eta egoera onean dauden baratzeko produktuak baitira, eta osasun-berme guztiak dituzte.

Hemendik aurrera egiten diren operazio guztiak Landa Garapeneko eta Ingurumeneko Departamentuak baimenduta izan beharko dute; departamentu horrek 48 ordu baino lehen ikuskatzaileak bidaltzeko konpromisoa hartu du prozesua arintze aldera. Aurrez egindako operazioak (maiatzaren 26tik gaur arte) dokumentuekin egiaztatu beharko dira.

Bilkuran teknikariek ekoizleei azaldu diete zer dokumentazio bete behar duten erretiratutako barazkientzat hautatutako helbidearen arabera; bete beharreko ereduak Departamentuaren webgunean eskuragarri izango dira.

Ezarritako zenbatekoei dagokienez, Araudiak zenbateko ezberdinak ezartzen ditu erretiratutako produktua doako banaketarako den (banaketa-kostua ere finantzatzen dena), edo produktuaren uzta bildu behar denaren arabera. Adibide gisa, tomatea kentzeagatik kiloko 40 zentimorainoko konpentsazioa lortu ahal izango zen, eta 60 zentimoraino igoko zen ongintzako erakundeei doan banatzeko erabiliz gero.

Izapide guztiak egin ostean, ordaintzeko eskaerak uztailaren 11tik aurrera egin ahal izango dira, eta ordainketak 2011ko urriaren 15a baino lehen egitea aurreikusita dago. Landa Garapeneko eta Ingurumen Departamentuko teknikariek kaltetuekin zuzeneko komunikazio-sare bat ezarri dute, prozesu honetan sor daitezkeen zalantza guztiak argitzeko xedez.