Nafarroako Gobernuak, Nafarroako Enplegu Zerbitzuaren bidez, bereziki langabeentzat diren ikastaroetan izena emateko epea zabaldu du; milioi bat euro baino gehiagoko aurrekontua du eta 1.000 plazatik gora eskainiko ditu. Lehenengo ikastaroak abuztuan hasiko dira.

Programek iraupen ezberdina dute eta lanbide baterako gaitasuna lortzeko aukera jasotzen dute. Batzuk Profesionaltasun Ziurtagiri bat lortzeko, izaera ofizialekoa, bideratuta daude. 71 ikastaroetatik, 8 CENIFER Energia Berriztagarrien Zentro Nazionalean ematen dira, eta 12 SNEren Iturrondo Prestakuntza Zentroan.

Azpimarratu behar da, ikastaro horiek lanean dauden pertsonek ere eska ditzaketela, ikastaro bakoitzeko gehienez ere sei plazatako kopurua bete arte.

SNEren programazioak ikastaroak eskaintzen ditu Iruñea, Agoitz, Lizarra, Doneztebe, Tafalla eta Tuteran. Edukietan sartzen dira: administrazio eta kudeaketako arloak, nekazaritza-arloa, arte grafikoak, eskulangintzak, merkataritza eta marketing-a, elektrizitatea eta elektronika, energia eta ura, eraikuntza eta obra zibila, fabrikazio mekanikoa, ostalaritza eta turismoa, informatika eta komunikazioak, instalazioa eta mantentze-lana, irudi pertsonala, irudia eta soinua, osasuna, kultur zerbitzuak, garraioa eta ibilgailuen mantentze-lana eta prestakuntza osagarria.

Prestakuntza-ekintza horien helburu nagusia langileak gaitzea da, langabezian eta lanean daudenak, lan-munduan sartzen laguntzeko.

Ikastaro horietan parte hartzeko izena eman ahal izango da: enplegu-agentzietan, ikastaroa ematen den zentroan eta online bidez. Izena emateko epea amaituko da ikastaro bakoitzeko behar besteko eskaera-kopurua dagoenean. Irailetik aurrera ikastaro gehiago eskaintzea aurreikusten da.