Mendiko ibilaldia ekainaren 25ean hasi zen Pirinioen mendebaldean, Hondarribia herri gipuzkoarrean. Egun bat geroago, hilak 26, ibilaldia Foru Erkidegoan sartu zen, eta bertan 7 etapa osatu dira Nafarroako Pirinioetan zehar. Ingurune horretan hamabost egunez ibiliko den karabana honetara elkartutako xendazaleek, paraje natural oso ikusgarriak eta aldi berean historikoki aberatsak direnekin gozatu ahal izan dute: Zugarramurdi, Larrungo tontorra, Gosorpil eta Veaux-eko mendatea, Iparlako tontorra, Ibañetako mendatea edo Erronkari.

Iragan uztailaren 1ean Orhi-ko tontorraren txanda zen, Atlantikotik abiatuz Pirinioetako lehen bi milakoa. Hitzordua 11:30ean jarrita zegoen Larrauko mendatean, eta bertatik Orhiko tontorrerako igoerari ekin zitzaion haize bortitzarekin; haize hori pixkanaka baretzen joan zen hegoaldeko hegaletik gora egin ahala, eta Iratiko Baso hostotsu ikusgarriarekin gozatu zuten.Ordu eta erdiko igoeraren ondoren, opari ederra zuten tontorrean zain: Pirinio guztiak hartzen zituen ikuspegi sinestezinak hodei artean eta, nola ez, bazkari partekatu bat.

Arratsaldean, Nafarroak Zeharkaldi Handiko parte-hartzaileei festa antolatu zien, Pirinioetako Lan Komunitateko zazpi lurraldeek egingo duten antzera mendi-zeharkaldia igarotzean. Festa nafarra Otsagabian ospatu zen: herrira egindako bisita gidatu batekin (frantsesez, gaztelaniaz eta euskaraz) hasi zen; jarraian, dantzariak, herri-kirol erakustaldia, ogi-mamien dastatzea, Zaraitzuko txistorra, etxeko postreak eta ardoa, eta baita Orhipeango festako proiekzio bat ere; azken hori herri horretan bertan izango da abuztuaren 27 eta 28an. Festa herrikoi horrek ibiltariak harritu eta liluratu zituen, eta Otsagabiako herriaren laguntzari esker egin ahal izan zen.

Leireko Mendilerrora eta Larrako mendigunera asteburu honetan egindako ibilbideen ondoren, Zeharkaldi Handiak Nafarroako Erreinua utzi eta Aragoiko lurretan sartuko da.