Iruñeko "Nafarroako Erreinua" Turismo Bulegoak 4.459 informazio-eskatzaileri arreta eman die uztailaren 5etik 10era. Jatorriari dagokionez, eskatzaileen % 53,16 estatukoak izan dira (2.530) eta % 46,83 (2.229), beste herrialde batzuetatik etorritako bisitariak.

Iazko datuekin alderatuz, aurten % 7 jaitsi da; atzerriko eskatzaileen artean % 6,2 jaitsi da eta % 7,7 estatukoen artean. Jaitsiera hori normaltzat jotzen da, Internet bidez bilatu den turismo-informazioak gora egin baitu.

Batez beste 800 eskatzaileri arreta eman zaio egunero. Jende gehien 09:00etatik 11:00etara bildu izan da. Hilaren 9an izan zen jende kopuru handiena: 1.101 eskatzaile guztira, horietatik 658 estatukoak eta 443 atzerritarrak. Jatorriari erreparatuz, estatuko bisitari-kopuru handiena hilaren 9an jaso zen: 508, guztira. Gainera, hilaren 7an eta 8an, 800 informazio-eskaeratik gora egin zen; hilaren 6an eta 10ean, berriz, 795 eta 687, hurrenez hurren. Bisitari-kopuru txikiena hilaren 5ean jaso zen (400 eskaera egin ziren); iaz, egun horretan, 904 bisita izan ziren.

Turista atzerritarren artean, frantsesak nabarmendu behar dira (% 17,76); ondoren, estatubatuarrak (% 16,28), australiarrak (% 12,9) eta britainiarrak (% 6,5). 2010. urtean, AEB lehen postuan zegoen, eta atzetik zeuden Frantzia, Australia, Italia ea Erresuma Batua.

Estatuko informazio-eskatzaileei dagokienez, nafarrak nabarmentzen dira (% 23,8). Ondoren, bartzelonarrak (% 13,2), madrildarrak (% 11,10), gipuzkoarrak (% 5,5) eta valentziarrak (% 5). Eskualde guztiek postua errepikatzen dute Gipuzkoak salbu, lehen postuetan agertzen dena Bizkaiaren ordez.