Nafarroako Osasun Zerbitzuko ospitaleetako eta ospitaleaz kanpoko larrialdi-zerbitzuek 954 pertsona artatu dituzte aurtengo Sanferminetan (uztailaren 6ko 12:00etatik uztailaren 14ko 08:00ak arte), zuzenean festarekin lotuta (iaz 996 izan ziren).

Kopuru horrek barnean hartzen ditu entzierroko 43 korrikalariri emandako arreta (2010ean 37 izan ziren). Horietatik lau zezen-adarkadaz zaurituak izan dira.

Datu horiek gaur goizean jakinarazi ditu Osasun kontseilari Marta Vera Janín-ek, Nafarroako Osasun Zerbitzuak San Fermin jaietan emandako osasun-zerbitzuaren balantzea aurkeztean. Prentsaurrekoan Verarekin batera izan dira Nafarroako Ospitale Gunearen zuzendari gerentea, Fernando Boneta Beorlegui, Nafarroako Ospitale Guneko Larrialdi Zerbitzuetako burua, Javier Sesma Sánchez; eta Ospitaleaz kanpoko Larrialdi Zerbitzuetako burua, Antonio Zubiaur Carreño.

Entzierroarekin loturarik izan ez duten 911 larrialdietatik, 637 (% 70) San Martin Doktorea osasun-zentroan artatu dira, hura izan baita larritasun gutxien zuten osasun-larrialdientzako erreferentziazko zentroa. Nafarroako Ospitale Guneko larrialdi-zerbitzuetan, aldiz, 274 pertsonari eman zaie arreta (%30).

Larrialdi-zerbitzuetara joan diren hiru herritarretik ia bik traumatismoak eta ustekabeko zauri desberdinak zituzten (guztien % 56) eta, askoz ere gutxiagok, intoxikazio etilikoak (% 20) eta erasoak (% 12). Bestelako kasuistikak, esate baterako politraumatismoak, droga-intoxikazioak edo elikadura-intoxikazioak, gutxi gertatu dira.

NOZen ospitaleko eta ospitaleaz kanpoko larrialdi-zerbitzuetan pertsona gehien larunbatean, uztailak 9, artatu ziren; zehazki, festarekin lotutako 178 larrialdi. Hurrengoak, ordenan, uztailaren 6a 6 (154), 7a (121), 8a (115), 10a (113), 11 (107), 13a (63) eta 12a (69) izan dira.

Nafarroako Larrialdi Agentziak Iruñeko eta bere Eskualdeko 574 anbulantzia-mobilizazio koordinatu ditu uztailaren 6ko eguerditik uztailaren 13ko gauerdira arte; iaz erregistratu zena (658) baino kopuru txikiagoa.