Nafarroako Gobernuak Nafarroako Foru Erkidegoko Minusbaliatu Fisikoen eta Organikoen Elkarteen Federazioari (COCEMFE) ikastaro bat ordainduko dio, prestakuntza-prozesu baten eta laguntza pertsonalizatuaren bitartez, ezgaitasun-erakundeetako arduradun diren profesional desberdinen kualifikazioa hobetzeko. Ikastaroaren kostua 34.000 eurokoa da, eta Nafarroako Gobernuak finantzatuko du erakunde horri emandako diru-laguntza moduan.

Hala adierazi dute Gizarte Politika, Berdintasun, Kirol eta Gazteriako kontseilari Elena Torres Mirandak, COCEMFEko zuzendari Begoña Blanca Gómez Bilbaok eta Gizarte Politika eta Kontsumoko zuzendari nagusi Javier Monzón Romék egindako bilera batean. Helburu horretarako, azken honek ere dagokion lankidetza-hitzarmena sinatu du COCEMFEko ordezkariarekin.

Prestakuntza-ekintza hori 2008an abian jarritako "Nafarroako ezgaitasun-erakundeak modernizatzeko planean" (MEDIS) sartuta dago, eta 2008an, 2009an eta 2010ean plan horren 1. eta 2. faseak burutu zituzten eta Nafarroako Bikaintasunaren Fundazioaren sarietara aurkeztu diren edo aurkez daitezkeen erakundeentzat bakarrik da. Hala, soilik honako 14 elkarte hauek eska dezakete prestakuntza egitea: ADEMNA, ADISCO, AFINA, AMIFE, AMIMET, ANAPAR, ANASAPS, ANPHEB, ARN, COCEMFE, Atena Fundazioa, Tutelar Fundazioa, Ibili eta Javier Egoitza. Parte-hartzaileen kopurua erakunde hauek aurkezten dituzten eskaeren araberakoa izango da.

Prestakuntza-ekintza bost orduko presentziazko 10 saiotan garatuk oda (irailetik azarora, ostiraletan, 09:00etatik 14:00etara), eta gainera parte hartzen duen erakunde bakoitzak "laguntza pertsonalizatua", parte-hartzaile bakoitzari egokitutako prestakuntza-prozesua, jasotzeko 17 orduko bono bat izango du. Sinatutako lankidetza-hitzarmenean zehaztu den bezala, ikastaroa Sinergium aholkularitza-enpresak emango du Nafarroako Gobernuko departamentu horrena den San Jose ezgaitasun-zentroan.