Barcina Lehendakaria: "Enpleguaren sorrera da Gobernu honen lehen helburua"

Bilkura amaitzean, Yolanda Barcina Lehendakariak hedabideei egindako adierazpenetan azaldu du, azken egunotan egindako bisita instituzionalen errondaren ondoren, "Lehendakari moduan nire bulegoan egin beharreko lehen bilkura eragile ekonomiko eta sozialekin izan behar zuen, Gobernu honen lehen helburua den enpleguaren sorrera sustatzeko".

Adierazi du, kontzertazio soziala eta Nafarroako Gobernuaren eta eragile sozial horien arteko enpleguari buruzko akordioa "oso emankorra eta garrantzitsua" izan dela azken urteotan. Haren emaitza da, Espainiako beste autonomia erkidegoekin alderatuz, Nafarroa hobeto dagoela eta krisi ekonomikoak ez diola hainbeste eragin. "Kontzertazio sozialak eta enplegu-planak enplegua sortzea dakarren esparru soziala sortzen dute, eta berpizte ekonomikoa eta, beraz, enplegua bizkortzen duen tresna dira". Hori dela eta, Gobernuaren apustua haiek bultzatzen segitzea da.

José Mª Molinero (CCOO): "Moderna Planaren B aldea"

José Mª Molinerok bere adierazpenetan azpimarratu du bilkuran planteatu den "itun sozial berria Moderna Planaren B aldea izan daitekeela eta izan behar duela, Nafarroako plan ekonomikoa dena; itun sozial batekin batera joan behar du, itun horri bidea eman diogu eta 2012. urtean zehar eraiki nahi dugu". Aipatu duenez, enplegua sortzea, kalitatezko enplegua eta gazteentzako enplegua helburutzat duten enpleguko politika aktiboak hitzartzea da kontua.Jose Mª Goyen (UGT): "Elkarrizketak eta kontzertazioak eman diote Nafarroari emaitza onenak"

Bilkuran UGTko ordezkari izan den Juan Goyenek bere adierazpenetan azpimarratu du "Nafarroako Gobernuaren eta eragile sozial nahiz ekonomikoen artean azken urteotan izandako elkarrizketak eta kontzertazioak krisi-egoera batean izan zitezkeen emaitza onenak ekarri dituela; Nafarroa, gainera, ondoen kokatuta dagoen autonomia erkidegoa da, eta Europako lehen 32 eskualderen barnean dago". Horregatik, gaineratu duenez, beharrezkoa da elkarrizketa soziala sustatzen jarraitzea "berez horrek enplegua sortzen ez badu ere, errekuperazio ekonomikorako esparrua sortzen baitu".

José Antonio Sarria (CEN): "Enplegurako neurri indartsuak behar dira"

CENeko lehendakaria, berriz, enplegurako itun berri bat adosteko beharrarekin bat agertu da, Nafarroari hain emaitza onak eman dizkion aurreko ildoari jarraiki. Zehazki, enpleguaren alde egiteko neurri "indartsuak" sustatzeko beharraz aritu da; haien artean prestakuntza enpresen eskariari egokitzeko beharra aipatu du, enpresen beharrak aldatzen baitoaz denborak aurrera egin ahala.