Deialdiko bost alorrei dagokienez (Zientzia eta Teknologia, Biomedikuntza, Artea eta Giza Zientziak, Gizarte Zientziak eta Enpresa Zientziak), ikasketa teknikoak egin dituzten eskatzaileak gehiago dira; hala ere, Ekonomia-Enpresa Zientzien alorrean igoera eman da. Beraz, Master of International Business (onartu diren 53 ikasleetatik 4 eskatzaile) edo Master in Business Administration -- MBA (4 eskatzaile) egiteko eskatu duten ikasleen kopurua handitu egin da, nahiz eta hirigintzan eta arkitekturan espezializaturiko ikasketak eta minbiziaren inguruko ikerketa nagusi izan.

Beste alde batetik, aurten, aurreko deialdietan Erresuma Batuko unibertsitateetan ikasteko egon den lehentasuna areagotu da; behera egin du, aldiz, Estatu Batuetako unibertsitateetan ikasteko hautagaien nahiak. 67 eskatzaileen % 40k Erresuma Batuan ikasteko asmoa izan zuen.

Onuradunen profila

Hogeita hamar onuradunetatik, seik ekonomiarekin loturiko ikasketak egin dituzte, sei biologian/biokimikan tituludunak dira, lau arkitekturan, lau komunikazioan, lau ingeniaritzaren batean eta gainerakoak beste titulazio batzuetan. Ikasiko duten espezialitateari dagokionez, hamarrek zientziekin eta teknologiarekin loturiko masterra egingo dute eta zazpik gizarte zientziekin loturikoa. Beste seik MBA bat edo finantzen eta kudeaketaren alorreko masterra egingo dute, bostek biomedikuntzako masterra eta bik arte eta giza zientziena.

Gogorarazi behar da bekak esleitzeko ezagutza alorren arteko oreka lortu nahi izan dela eta deialdian ezarritako kupoak errespetatu direla. Kupoen arabera, sei beka eman behar izan ziren zientzien eta teknologiaren alorrekoak, sei enpresen alorrekoak, sei gizarte zientzietakoak, lau biomedikuntzakoak eta bi arte eta giza zientzien alorrekoak.

Beken helburueri erreparatuta, hogeita hamar ikasle bekadunetatik hamahiruk Erresuma Batuko unibertsitateetan egingo dute masterra, bostek Estatu Batuetan, lauk Danimarkan, bina ikaslek Australiako, Herbehereetako eta Suitzako unibertsitateetan eta ikasle banak Irlandako eta Finlandiako unibertsitateetan. Aukeratutako helburuen artean Harvard, Delfteko Unibertsitatea, London School of Economics edo Manchesterreko Unibertsitatea daude.

Esleipendunak 22 eta 37 urte arteko 16 gizon eta 14 emakume dira, eta batez beste 26 urte dituzte. Horietatik hamalauk Nafarroako Unibertsitateko tituluak dituzte, eta zortzik Nafarroako Unibertsitate Publikokoak. Beste bostek Espainiako beste unibertsitate batzuetan ikasi dute, batek atzerriko unibertsitate batean eta bik musikako ikasketak egin dituzte.

Bekak urtebetekoak (2 seihileko) izango dira gutxienez eta bi urte eta erdikoak (5 seihileko) gehienez ere. Bekak esleitzeko hautagaien espedientea (puntuazioaren % 60), master programaren kalitatea (% 25) eta Nafarroarentzat programak duen interes estrategikoa (% 15) hartu dira kontuan. Deialdiak bekaren kontzeptuak ezarri zituen, hau da, Nafarroako Gobernuak bere gain hartuko dituen gastuak: helburuko unibertsitateko master programaren matrikula, eskolak ematen diren hile bakoitzeko egonaldia (ostatua, mantenua eta bestelako gastuak) eta bi seihileko bakoitzean joan-etorria.

Nafarroako Nazioarteko Plana

Nafarroa Bekak programa 2008-2011ko Nafarroako Nazioarteko Planaren barruan egiten da. Helburu estrategikoen artean Nafarroako gizartea trebatzea eta sentsibilizatzea daude, herritarrak, inguru global batean, pertsonalki eta lanbideari dagokionez garatzeko aukerak aprobetxatzeko gai izan daitezen. Beken programaren helburua unibertsitateetako espedienterik onenek atzerriko ikastetxe bikainetan master programak egiteko aukera izatea eta, ondoren, lortutako trebakuntza eta gaitasuna Nafarroan aplikatzea da. Ekintza horren azpian Nafarroako produkzio sarera ekarpena egiten duten lagunen taldea osatzeko gogoa dago, hau da, nazioartean atzerriko unibertsitate nagusietan ikasitakotik atera ditzaketen azken berrikuntzak eta ekarpenak eskaintzeko.