Nafarroako Gobernuak 90.000 euro emango ditu berehala Somalian gosetearen aurka borrokatzeko. Hain zuzen ere, 90.000 euroko diru-laguntza emango dio Unicefek Nafarroan duen Batzordeari, ahal den neurrian, NBEren erakunde horren helburua artatze aldera datorren hiru hilabetetan Somalian; hau da, elikadura desegokiko 554.00 haurrek eta malnutrizio akutuko 34.000 emakume haurdun edo bularreko haurrek bizirik irautea.

Unicefek Somalian duen proiektuan, besteak beste, helburu hauek lortu nahi dira: amei aholkularitza eskaintzea edoskitze naturala sustatzeko eta elikadura orekatua eskainiz laguntza ematea; elikadurazko osagarriak banatzea, erabiltzeko prest dauden elikagai terapeutikoak banatzea eta edateko ura banatzea. Programaren aurrekontu osoa 1.420.000 eurokoa da, eta hori finantzatzeko nazioarteko laguntza eskatu du Unicefek. Nafarroako Gobernuak, aipatu moduan, 90.000 euroko laguntza emango du.

Diru-laguntza hori emateko, batez ere aintzat hartu da Unicef nazioarteko erakundea izatea eta 210 langile aritzea Somalian, lan horretan. Gainera, Unicefen Nafarroako Batzordea nazioarteko erakunde horri zuzendutako ekarpen publiko deszentralizatuak edo pribatuak bideratzen dituen erakunde bakarra da Foru Erkidegoan. Egoera horrek, beraz, larrialdiko giza laguntzaren lan ona bermatzen du.

Laguntza Garapenerako Lankidetzaren inguruko martxoaren 9ko 5/2001 Foru Legeari jarraiki emango da; Lege horren arabera, Lankidetza horren helburuetariko bat da garapen bideko herrialdeetako larrialdiko egoerak artatzen esku hartzea, laguntza humanitarioaren bidez. Laguntza humanitarioaren helburu nagusia da herri ahulen bizitza zaintzea, kontuan izanik izaki guztiek hautatzeko gaitasuna ematen dioten duintasuna eta eskubide batzuk dituztela.