Done Jakue Bideko kultur eta hizkuntza aniztasunari buruzko erakusketa ikusgai egongo da gaurtik aurrera Garesen. Erakusketa Vinculo Etxean aurkitzen da, kale Nagusiko 105. zenbakian, abuztuaren 31ra bitarte. Erakusketaren ordutegia ondorengoa da: 10:00etatik 14:00etara eta 16:00etatik 19:00etara, asteartetik ostiralera eta 11:00etatik 14:00etara, igandeetan. Astelehenetan instalazioak itxita egongo dira.

Erakusketan hainbat informazio-panel daude; baita ere, jolas interaktibo bat, Done Jakue Bidean zehar dauden hizkuntza eta kultura ezberdinak ezagutzera emate aldera. Arreta berezia eskaini zaie eskualde mailako eta/edo eremu urriko hizkuntzei; hala nola, galiziera, euskara, aragoiera, okzitaniera (Frantzia hegoaldean, Arango haranean eta Piemonteko Alpeetako eremu batean (Italian) hitz egiten den hizkuntza erromanikoa), bretoiera (Frantziako ipar-mendebaldea), frisiera (Holandako eta Alemania ipar-mendebaldeko eremu batzuk) eta niederdeutsch (Alemaniako iparraldea) hizkuntzari. Dena den, gaztelera, alemana, frantsesa eta ingelesa ere sartu dira.

Erakusketa ibiltaria da, eta, Gares herrira iritsi aurretik, Iruñean eta Orreagan erakutsi da. Ondoren, Compostelako Done Jakuen (irailaren 5etik urriaren 24ra) eta Kiel-go Unibertsitatean, Alemanian, (urriaren 28tik abenduaren 22ra) ikus ahal izango da.

Ekimena eskualde-mailako hizkuntzen garapenaz arduratzen diren Europako sei erakundek bultzatu dute: Euskarabideak, Galiziako Xuntako Hizkuntza Politikako Idazkaritza Nagusiak, Bretainiako Hizkuntzaren Bulegoak, Aragoar Filologiako Ikasketen Elkarteak, Kiel-go Christian-Albrechts Unibertsitateak (Alemania) eta Euroccat-ek (Okzitaniako eta Kataluniako herrialdeen 2000 Eurobiltzarra). Erakusketaren %50 Hezkuntza, Ikus-entzunezko eta Kultura eremuko Agentzia Exekutiboak (EACEA) finantzatzen du.