Nafarroako Aldizkari Ofizialean (NAO) gaur, abuztuak 5, argitaratu da minimis araubideko laguntzak erregulatzen dituzten oinarriak jasotzen dituen foru agindua; laguntza horiek abeltzainen ustiategietako inbertsioen maileguen interesentzat hobariak emateko erabiltzen dira. Laguntzak telematikoki kudea daitezke Zerbitzuen Katalogoan dagokien fitxaren bidez edo Landa Garapen, Industria, Enplegu eta Ingurumen Departamentura edo eskualdeetako bulegoetara joanda. Eskaerak aurkezteko epea bihar, abuztuak 6, irekiko da, eta 30 egunekoa izango da; hots, irailaren 5era bitarte.

Minimis laguntzak ustiategietan likidezia-arazoak dituzten abeltzainentzat dira. Arazo horiek dituzte batik bat produkzio-kostuak igotzeagatik (nagusiki pentsuak, zerealaren prezioak igotzearen ondorioz), abeltzainen produktuei aplikatzen zaizkien prezioetan ez baitute ondoriorik izan. Egoera hori medio, abeltzainen ustiategi batzuk, bereziki esnetarako eta haragitarako behi-aziendak dituztenak, ordainketa-etenduran sartu dira.

Testuinguru horretan, Nafarroako Gobernuak pasa den uztailaren 18an erabaki zuen 300.000 euroko gasturako konpromisoa hartzea Foru Erkidegoko abeltzainek ustiategietan inbertsioak egin eta zorpetze hori diruz laguntzeko. Gastu hori gehituko zaio Estatuaren laguntzari; hots, Nekazaritza Kauzioko Estatuko Sozietate Anonimoak (SAECA) abalen bidez ematen duenari. Laguntza-pakete horretan bi lerro daude.