Nafarroako Gobernuak orotara 374.902 euroko diru-laguntza eman die irabazi asmorik gabeko lau erakunderi; hots, hasierako lanbide-prestakuntza programak (HLPP-Lanbide Lantegiak), gazteak laneratzera eta gizarteratzera zuzenduak, garatzen dituztenei. Diru-laguntza 2010eko irailetik 2011ko abuztura bitartekoa izango da.

Erakunde hartzaileen artean honako hauek aurkitzen dira: Ilundáin Haritz-Berri Fundazioa, El Castillo Fundazioa (Elizbarrutiko Caritas), Etxabakoitz Lantegi Eskola Fundazioa eta Lantxotegi Elkartea. Horiek guztiek portaera ez sozialak, eskola-porrota eta gizartera egokitzeko arazoak dituzten 14 eta 20 urte arteko gazteentzako prebentzio eta tratamendu programak garatzen dituzte. Era horretan, hitzarmenak eginda dituzte Gizarte Politika, Berdintasun, Kirol eta Gazteria Departamentuarekin, lanbide-prestakuntzako lantegiak garatze aldera.

Gazteak lan eta gizarteratzera zuzendutako lantegien egitura eta antolakuntzaren eskumena Nafarroako Gobernuarena da, eta hori gauzatzeaz Gizarte Politika, Berdintasun, Kirol eta Gazteria Departamentua arduratzen da. Gizartera moldatzeko zailtasunak dituzten gazteak artatzen dituzten irabazi asmorik gabeko erakundeek egindako lantegietarako laguntzak kudeatzen ditu azken departamentu horrek; beraz, erakunde horiek jasotzen dute aipatu diru-laguntza.

Lantegien egitarauak 2.100 edo 1.050 ordukoak izaten dira, kasuen arabera, eta irakaskuntza ofizialeko ikastetxe bati atxikita egon behar dute. Hona hemen ikastetxe horiek: BHI Uharte Iruñeko eskualdean dauden erakundeentzat (Haritz Berri Ilundainen, Lantxotegi Berriozarren eta Etxabakoitz Iruñean) eta Tuterako CIP ETI herri horretan dagoen zentroarentzat (El Castillo).