Antonio López –Asturiasko Printzearen Arte Saria 1985. urtean eta Arte Plastikoen Velázquez Saria 206an—, José María Mezquita –Arteen Gaztela eta Leon Saria 2006. urtean— eta Juan José Aquerreta —Vianako Printzearen Kultura Saria 2003an— pintoreek aste honetan emango dute ‘Figurazio maisuak’ pintura-lantegiaren seigarren edizioa, Nafarroako Unibertsitateak Nafarroako Unibertsitateen XI. Udako ikastaroen barruan antolatua. Ikastaroak Nafarroako Gobernuak, Hezkuntza Departamentuaren bidez, eta Iruñeko Udalak finantzatzen dituzte.

Guztira, 33 ikasle izango dira ikastaroan, abuztuaren 8tik 12ra bitartean, goiz eta arratsaldez, Nafarroako Unibertsitateko Arkitektura eraikinean. Bertan, tradizio figuratiboko generoak landuko dituzte; esate baterako, natura hila, gizakiaren irudia —ereduak naturalean— edota paisaia. Parte-hartzaileak irakasleek hautatu dituzte haien maila teknikoaren eta curriculumaren arabera.

Lantegiari gaur (astelehena) emango zaio hasiera, eta, hasteko, Zabalguneko merkaturako bisita tradizionala egingo dute, eskoletan natura hila osatzeko eta margotzeko erabiliko dituzten frutak eta barazkiak erosteko.

Asteazkenean, uztailaren 10ean, Nafarroako Museoan emango da "San Adriango Markesari" buruzko eskola; hots, Francisco Goyaren helduaroko erretraturik onenetarikoaren ingurukoa. 20:00etan, berriz, museoan bertan, mahai-ingurua eskainiko da jende guztiarentzat, eta pintoreek beren pintura-ikuspegiak, lan egiteko moduak eta lantegian sortutako beste kontu interesgarriak aztertuko dituzte.