Bi hilabete hauetan, neska-mutilak abegi-familiekin bizi izan dira, eta zenbait ekitalditan egon dira elkarrekin. Bidaiari esker, gainera, Saharako herriko mandatari bihurtu dira Foru Erkidegoan.

Gehienez, bost urtez goza dezakete programa honetaz, eta, ahal bada, familia berekin egon daitezke beti aldi horretan, harremana estutzeko.

Gogoratu behar da Saharako Lagunen Nafarroako Elkarteak lan solidario hori egiteaz gain, hartutako adingabeen familiak, urtean bitan, Aste Santuan eta abenduan hain zuzen, errefuxiatu-esparruetara joaten direla hartutako adingabeak bisitatzeko.

Nafarroako Gobernuak 419.186 euro bideratu zituen Saharako biztanleentzat 2010. urtean, hasieran aurreikusitakoa baino % 10 gehiago (382.733 euro). Tindufen errefuxiatutako sahararrak izan dira Nafarroaren garapenerako laguntza ofizialaren hartzaile nagusietako batzuk, 2007. eta 2010. urtean. Aldi horretan, 1,8 milioi euro baino gehiago bideratu ditu, hots, hasieran aurreikusitako kopurua baino % 23 gehiago. "Saharako biztanleentzako laguntza humanitariorako" bideratutako aurrekontuko partidaren hasierako zenbatekoa 270.000 eurokoa da. 

ANAS elkartea Nafarroako Gobernuaren eskutik laguntza ekonomikorik handiena jaso duen erakundeetako bat da; izan ere, 2007. urtetik 536.093 euro jaso ditu. Laguntza horietatik, 423.000 euro, Saharako errefuxiatuen osasunarekin zerikusia duten proiektuetarako bideratu dira, eta beste 113.093 euro, Tinduf-en hartutako hezkuntza hobetzeko jardueretarako. ANAS, Nafarroan dagoen sahararren ordezkariaren ekimenari esker sortu zen. Jendea bilatu zuen ordezkaritzaren jardueretan laguntzeko elkartea osatzeko, Fronte Polisarioaren ekimenaren bidez sortutakoa.