Nafarroako Gobernuak datorren abuztuaren 31n itxiko du Martin de Azpilicueta Sariaren zortzigarren ediziorako lanak aurkezteko epea. Lehiaketaren xedea administrazio publikoen, sektore publikoaren eta Foru Zuzenbide Zibilaren jardueraren inguruko ikerketa sustatzea da.

Saria 10.00 euro eta diploma izango dira, eta entregatzeko, ekitaldi publikoa antolatuko da. Epaimahaiak 5.000 euroko accesita ere eman dezake.

Sariaren bidez, banako pertsonek edo taldeek argitaratutako lanik onenak sarituko dira. Gaiak hauek dira: Nafarroako Foru Erkidegoko erakundeak eta antolamendua; Foru Zuzenbide Zibila; giza baliabideen kudeaketa; Nafarroako Administrazio Publikoen kalitatea modernizatzeko eta hobetzeko aplikazio soziologikoak, eta sektore publikoa arrazionalizatzekoak; politika ekonomikoa, ekonomiarekin, ogasunarekin, aurrekontuekin eta kontabilitate publikoarekin zerikusia duten gaiak eta lurralde- eta ingurumen-politika, lurralde antolamenduarekin, hirigintzarekin, etxebizitzarekin, ingurumenarekin, landa-garapenarekin eta mendi-eremu, mendi, obra publiko, garraio eta bestelako antzeko sektoreekin harremana dutenak.

Lanek, gutxienez, 150 orrikoak izan beharko dute, eta gaztelaniaz, euskaraz edo Europar Batasuneko hizkuntza ofizialetako batean idatzita (azken kasu honetan, gaztelaniazko itzulpenarekin batera).