Nafarroako Gobernuak gaur iragarri du Belate eta Almandozko tunelak irailaren 15ean irekiko direla berriz, goizeko 09:00etan. Gogoan izan, tunelak uztailaren 8an itxi zirela, sendagai-hautsen zakuak zeramatzan kamioi batek Iruñera aldera zihoala su hartu ondoren, eta azpiegituran kalte larriak eragin zituen.

Denboraldi horretan eta kalteak konpontzearekin batera, prebentzio-izaerako jarduerak egin dira bi tuneletan, era horretan, epe laburrean trafikoari gehiago eragin ez diezaion.

Gobernuak irekiera horren berri eman die jada inguruko udal, ostalari eta garraiolariei, jabetzen baita tunelak itxita izateak zer eragozpen sortzen zizkien. Horrexegatik, Astiz kontseilariak egoera honi aurre egiteko erakutsitako pazientziagatik eskerrak eman dizkie.

Azpiegitura konpontzeko lanak Mariezcurrena Eraikuntzak (egitura berriz eraiki du), eta SICE SA enpresak burutu dituzte. Azken horrek, alde batetik, suteak kaltetutako materiala desmuntatu eta kendu du eta, bestetik, kaltetutako segurtasun-sistema guztiak konpondu ditu.

Nafarroako Gobernuak obra horretako jarraipen-batzordeak biltzen jarraituko du haiek igortzen dizkieten eskaera eta iradokizunei erantzuteko.