Nafarroako Gobernuak 410.000 euro ematea erabaki du gaur Iturmendin Haur eta Lehen Hezkuntzako ikastetxe publiko berri bat eraikitzeko. Gainera, obrak gauzatzeko udalerriko udalarekin lankidetza-hitzarmeneko testua onartu du

Nafarroa 2012 Planaren barnean dagoen jardueraren helburua bere ikasle guztientzat kalitatezko heziketa bat bermatzea da. Egungo eraikina ikasle horientzat zaharkituta geratu da hezkuntza-sistemaren beharrak betetzeko. Horren ondorioz, eraikin berriak egungo ikastetxea ordezkatuko du. Bertan 27 ikaslek ikasten dute hiru taldetan banatuta, eta 4 irakaslek egiten dute lan laguntzeko beste langile batzuekin batera.

Proiektua udal-jabetzakoa den 3.884 metro koadroko lursail batean kokatuko da, Estafeta eta Iturmendi kaleen alboan dagoena, eta Haur nahiz Lehen Hezkuntzako hiru unitatetarako lekua izango du. Obrak datorren urtean hasi eta 2012-2013 ikasturterako amaituko direla aurreikusten da.

Eraikin berriak Haur nahiz Lehen Hezkuntzako hiru unitatetarako lekua izango du, eta ondorengo espazioak edo, haien baliokideak, izango ditu: ohiko hiru ikasgela (40 m2), erabilera anitzeko ikasgela bat (60 m2), ikasleentzako bi komun (15 m2) eta irakasleentzako beste bat (5 m2), garbiketako gela bat (2 m2), zuzendaritzako bulego bat (20 m2), instalazio-gela bat (10 m2) eta karrerape estali bat (60 m2).

Iturmendiko Udala arduratuko da eraikuntza-proiektu honen esleipen-espedienteak izapidetzeaz, proiektua idazteaz, obren zuzendaritza teknikoaz eta haiek egikaritzeaz.