Nafarroako Gobernuak Ágora GKEarekin lan egingo du gazte immigranteen taldeekin bitartekotzako proiektu baterako. Proiektu hori Iruñean eta Iruñerrian garatuko da eta, horretarako, Foru Gobernuak GKE horri 50.000 euro emango dio.

Helburu horrekin, Kulturako, Turismoko eta Erakunde Harremanetako Departamentuko kontseilari Juan Luis Sánchez de Muniáinek hitzarmen bat sinatu du Bitartekotza Sozialeko Ágora Elkarteko presidente Daniel Garcíarekin.

Komunitateko Bitartekotza Sozialeko Ágora Elkarteak elkartzeko komunitate-espazioak sortzeko dagoen gero eta behar handiagoari erantzuna emateko sortu da, pertsonen arteko gatazkak konpondu ahal izateko eta komunitate guztiari eragiten dioten arazoei konponbideak emateko.

"Iruñea eta Iruñerrian gazte immigranteen taldeekin esku-hartzeko proiektua" izeneko bere proiektuaren hartzaileak formalki edo era informalean osatutako gazte-taldeak dira, Iruñean eta Iruñerrian daudenak, eta baita haiengandik hurbil dauden gazteak edo haien artekoak izateko arriskuan daudenak. Oro har, 15-25 urte arteko gazteak dira.

Proiektua Iruñeko Txantrea, Errotxapea, San Jorge eta Milagrosako auzoetan oinarrituko da, eta baita Iruñerriko Burlata, Atarrabia, Barañain, Antsoain eta Berriozar udalerrietan.

Beren jarduerak, topaguneak, taldeen kopurua eta haien ezaugarriak ezagutu eta hautemateko bideratuta daude, kaleko lanaren eta sareko lanaren bitartez eta herriz herri egindako ibilbide eta bideen bitartez.

GKEko kideek taldeen barnean hurbilketa eta legitimazioa bilatuko dute banakako esku-hartzeen bitartez. Esku-hartze horiek gizarte, prestakuntza, lan, zuzenbide eta administrazioko alorretan aholkularitza, informazioa eta bide-laguntza emateko orientatuta daude. Ekintza hori kalean bertan egingo da lehen esku-hartzeak ebatzi edo egiteko xedez, baina baita bulegoan ere; hemen jarraipen zehatzagoa eskatzen duten arazo zehatzagoak konponduko dira.

Banakako esku-hartzea taldeetakoak diren 40 gazterekin egingo da gutxienez, nahiz eta taldeetakoak ez diren zeharkako onuradunak ere izango diren.

Elkarteen arteko harremanak sustatzea bilatuko da, bai eta ekimenak nahiz esperientziak trukatzea ere barneko eta kanpoko koordinazioaren bidez. Horrek eskatzen du, barne-koordinazioko (astean behin) eta kanpo-koordinazioko (hilean behin, hiru hilean behin, urtean behin) bilerak egitea.