Nafarroako Gobernuak lan eskaintza publiko baterako deialdia egingo du. Horrenbestez, bitarteko izaeraz lanean jarraitzen duten udaleko 12 idazkarik eta 31 kontu-hartzailek lanpostu bat jabetzan lortu ahal izango dute. Ekimena lehen lehendakariorde eta Lehendakaritzako, Administrazio Publikoetako eta Barneko Departamentuko kontseilari Roberto Jiménezek iragarri du gaur; halaber, adierazi du lanpostu horietarako deialdia egiteko dagokion foru-agindua prest dagoela jada.

Lanpostuak Foru Erkidegoaren tokiko 39 erakunderen hutsuneak betetzeko dira. Udal-idazkarien kasuan, honako udal hauetakoak dira: Iruñea, Barañain, Antsoain, Cintruénigo, Murchante, Erriberri, Zizur Txikia, Caparroso, Etxarri Aranatz, Irurtzun, Esteribar eta Agoitz.

Kontu-hartzaileen lanpostuei dagokienez, honako herri hauetako hutsuneak beteko dira: Egues, Lizarra, Zizur Nagusia, Atarrabia, Berriozar, Baztan, Corella, Cintruénigo, Aranguren, Noáin, San Adrián, Huarte, Peralta, Zangoza, Lodosa, Berriobeiti, Castejón, Cascante, Viana, Azagra, Mendabia, Murchante, Bera, Erriberri, Beriain, Ribaforada, Orkoien, Milagro, Cortes, Zizur Txikia eta Andosilla

Probak 2012ko bigarren seihilekoaren aurretik egitea eragozten du legeak, baina deialdia, gutxienez, sei hilabete lehenago egitea eskatzen du. Hala, enplegatu publikoen talde horrek bitarteko izaerako egoera hori 2013ko hasieran amaitutzat ematea aurreikusten du.

Proben aurretik, jabetzan lanpostua lortuta duten udaletako idazkari eta kontu-hartzaileek hutsik dagoen lanpostu horietako bat eskuratzeko aukera izango dute, dagokien merezimendu-lehiaketaren bidez. Lanpostu horietakoren bat lortuko balute, haiek hutsik utzitakoak lehiaketara aterako lirateke.

Gaur iragarritako deialdiarekin, 2009ko ekainean sortu zen egoera konpontzen da, Konstituzio Auzitegiak prozesua baliogabetu zuenean bitartekoak idazkari eta kontu-hartzaile izateko. Epai horren ondorioz, 79 udal-idazkarik zituzten proba batzuk baliogabetu ziren.