Nafarroako Gobernuak 2012. urterako Nafarroako Aurrekontu Orokorrak lantzeko jarraibideak onetsi ditu gaurko bileran. Onetsitako testuak jasotzen duenez, gastu-muga 3.711 milioi eurokoa izango da, hau da, 2011ko aurrekontuan baino % 2,95 gutxiago eta % 7,1 gehiago urtea ixteko aurreikuspenarekin alderatuz.

Bigarren lehendakariorde eta Ekonomia eta Ogasun kontseilari Álvaro Miranda Simavillak 2012ko aurrekontuak osatzeko prozedura berria azaldu du gaur goizeko prentsaurrekoan; aurrekontu horietan gastu/hobari fiskalak sartuko dira, eta finantzakoak ez diren diru-sarrera eta gastuen aurrekontua egingo da Kontabilitate Nazionalaren baldintzetan.

2012ko Nafarroako Aurrekontu Orokorrak lantzeko jarraibideak, 2012an BPGd-a % 1,9 haztea kalkulatzen duen egoera makroekonomiko batetik abiatzen dira; horrekin batera, enplegua sortzea aurreikusten du, urtean batez beste % 0,8 haztea, BPGd-ren gainean % 1,3ko defizita helburutzat jarrita. Espainia osoan, datorren urterako BPGd-a hazteko aurreikuspena % 2,3koa da, eta % 1,4koa urteko batez besteko enplegua handitzeari dagokionez; defizitaren helburua, berriz, -%4,4koa da.

Egoera honetan, Miranda kontseilariak adierazi duenez, Nafarroako Gobernuak zergaren bidez diru-sarrerak % 2,5 igoko dela kalkulatzen du 2011. urtea ixteko aurreikuspenarekin alderatuz. 2012rako finantzakoak ez diren diru-sarrerak kontuan hartuz (zergak, tasak eta beste diru-sarrerak barne), guztira 3.407,0 milioi euro lortzen da, 2011. urtea ixteko aurreikusitakoa baino gehiago. Hala, Nafarroako Gobernuaren aurrekontuen diru-sarrerak handitzeko bidea finkatzen da.

2012rako defizitaren helburuari dagokionez, BPGd-a % 1,3an kokatzen da, aurtengo ekitaldian bezala, hau da, 257 milioi euro. Aldiz, 47 milioi euroko balioa duen kontabilitate nazionaleko doitzeak kalkulatzen dira.