Kirol administrazioaren eskumenak eta Nafarroako Gobernuaren eginkizuna

Foru Erkidegoko kirol administrazioa Nafarroako erabilera publikoko kirol bideen arloan eskuduna izango da.  Administrazio horri dagokio kirola egiteko mendi-ibilien zaletasuna sustatzea, mota guztietako bideak (GR, PR, TI) baimentzea, bideen alorrean eskudunak diren beste organo batzuk burutzen dituzten jarduerak koordinatzea behar denean, kirol bideen homologazioa eta baimena baliogabetzea baldintza egokiak bete ezean, eta erabilera publikoko kirol bideak erregistratzea.

Nafarroako Gobernuari dagokionez, departamentu bakoitzak eginkizun ezberdinak izango ditu:

Landa Garapen, Industria, Enplegu eta Ingurumen Departamentuak, bideak homologatu eta baimendu aurretik, bidea sarean gehitzea egokia den ala ez erabakitzeko nahitaezko txosten loteslea egingo du, inguru naturalean izan ditzakeen ondorioei lotuta. Horrez gain, bideak sortu, hobetu edo mantentzeko burutu beharreko jarduerak ere baimenduko ditu, basoei, ingurumenari, abereen bideei loturiko araudia edo beste edozein aplikatzen direlako bideak baimentzea nahitaezkoa denean.

Bestalde, Kulturako, Turismoko eta Erakunde Harremanetako Departamentuak ere nahitaezko txosten loteslea egingo du bideen seinaleei lotuta, bideak homologatu eta baimendu aurretik, bideak Nafarroako Kultura Ondarea osatzen duten ondasunetan izan ditzakeen ondorioak direla eta. Horrez gain, turismoa helburu izanik, mendi-ibiliak egiteko zaletasuna sustatuko du eta Nafarroako Kirol Bideen Sarea iragarriko du sustapen turistikorako bitartekoen bidez.

Mendi eta Eskalada Kirolen Napar Federakundearen eginkizunak

Federazioaren egitekoak bideak homologatzea eta baimendutako bideak aldatuz gero nahitaezko txosten loteslea egitea dira. Horrez gain, kirol administrazioari jakinarazi beharko dizkio bideen kontserbazioari eta mantenimenduari buruz dakizkien gorabeherak.

Mendi eta Eskalada Kirolen Napar Federakundeak, ordezkari gisa, Foru Erkidegoaren kirol administrazioaren koordinazio eta tutoretzapean, administrazio arloko ondorengo eginkizun publikoak beteko ditu:

a) Bideen homologazioak eta baimenak baliogabetzeko prozedurak hasi eta ebatzi.

b) Topogidak eta bideen bestelako euskarri informatikoak egiteko irizpideak ezarri.

c) Bideen matrikulen esleipena kudeatu Espainiako Mendi Kirol eta Eskalada Federazioaren arauekin bat etorriz.

d) Bide homologatuetan erregistraturiko seinaleak erabiltzea baimendu.

e) Nafarroako Foru Erkidegoko kirol administrazioarekin lankidetzan aritu Ibilbide Luzeko (GR) bideak diseinatu, egin, kudeatu eta mantentzeko orduan.

Nafarroako erabilera publikoko kirol bideak homologatu eta baimentzeko prozedura hasteko sustatzaileak eskaera egin beharko du Nafarroako Foru Erkidegoko kirol administrazioan, edo administrazioak ofizioz has dezake prozedura.

Edozein pertsona fisikok edo erakunde publiko edo pribatuk sustatu dezake bide bat.

Erabiera bateragarriak eta finantzazioa

Mendi-ibilien jarduerarekin bateragarriak izango dira mendi-ibiliak egiten dituztenak eragotzi gabe gauzatu daitezkeen erabilera tradizionalak.
Baita, adibidez, turismoa naturan, mendizaletasuna, ingurumen heziketa eta txangozaletasuna ere, eta, batzuetan, zaldiko jarduerak era motorrik gabeko ibilgailuetan joan-etorriak egiteko beste modu batzuk, betiere oinez doazenek duten lehentasuna errespetatu eta inguru naturala hondatzen ez badute.

Hala ere, Nafarroako Gobernuak erabilera horiek muga ditzake, aldi baterako edo behin betiko. Mendi-ibiliak egiteko jarduera bera ere debekatu dezake, ekosistema sentikorrak, suteak izateko arrisku handia duten basoak edo babestutako espezieak babestea beharrezkoa denean.

Homologatu eta baimendu nahi diren kirol bideak ezarri eta mantentzeko finantzazioa sustatzaileari dagokio. Hala ere, Nafarroako Gobernuak eta Mendi eta Eskalada Kirolen Napar Federakundeak ere lagundu ahal izango dute Ibilbide Luzeko bideak mantentzeko orduan.