Guztira 25.386 erromesek ostatu hartu dute Orreagako aterpetxe berrian aurtengo otsailean inauguratu zenetik. 183 lagunentzako lekua duen instalazio hori, hortaz, beteta egon da egun gehienetan. Jende gehien ibili den egunetan, gainera, lehengo aterpetxea ere erabili da, 128 lagunentzako lekua duena.

Momentuz urte honetan Orreagatik pasa den erromes-kopurua 2.397 pertsonatan gehitu da, hau da, iaz baino % 5,4 gehiago. Zehazki, 2011ko urtarrilaren 1etik abuztuaren 31 bitartean 46.274 erromes pasa dira; aurreko urteko aldi berean, 43.977 izan ziren.

Kulturako, Turismoko eta Erakunde Harremanetako Departamentuko kontseilari Juan Luis Sánchez de Muniáinek Orreagako instalazio berriak bisitatu ditu, Natividad de Mariaren festa handia ospatzen dela eta. Iragan otsailaren 25ean inauguratu zen aterpetxerako Nafarroako Gobernuak 6,4 milioi euro inbertitu zuen, Nafarroa 2012 Planaren barnean.

Sánchez de Muniáinek instalazio berriak izandako "harrera ona" azpimarratu du, eta azken xehetasunen berri jakin nahi izan du, bereziki aterpetxeko plazaren egokitzapena eta bizikletentzako estalpea.

Gainera, adierazi du Nafarroako Gobernuarentzat Orreaga "foruaren turismo-sektorearen ardatzetako bat" dela, eta leku horrek "garrantzi estrategikoa duela zonaldean aberastasuna eta enplegua sortzeko orduan".