Udako ikastaro batek hondakin erradiaktiboen, itsas hondakinen eta hilerri elektronikoen oraina eta etorkizuna aztertuko ditu, bai eta hondakin-mota horren kudeaketa ere Foru Erkidegoan. "Kutsadura esportatuz: zabor transnazionalak: Arazoak eta irtenbideak" izeneko ikastaroa irailaren 14tik 16ra burutuko da Iruñeko Condestableko Jauregian, Nafarroako Gobernuak eta Iruñeko Udalak finantzatzen dituzten unibertsitate nafarren uda-ikastaroen barnean.

Nafarroako Unibertsitate Publikoko Zuzenbide Publikoa-Kultura eta Gizartea Institutuaren Departamentuak antolatutako monografikoak hondakinak eta isuriak nola kudeatzen diren aztertuko ditu hamar saiotan, bertako ikuspegi nahiz ikuspegi transnazional batetik. Azpimarratuko dira, herrialde garatuetatik garatze-bidean dauden zonaldeetara esportatzen diren hondakin erradiaktibo eta elektronikoak, bai eta itsas hondoen erabilera ere hondakinak uzteko toki gisa. Gainera, arazo horren sorreran toki-mailak duen erantzukizunaz eztabaidatuko da, 2010-2020 Nafarroako hondakinen plan integral berrian oinarrituz.

Ikastaroa hiru gaitan banatzen da. Hala, asteazkeneko jardunaldian, irailak 14, Ángel Ruiz de Apodaca Nafarroako Unibertsitateko Administrazio Zuzenbideko irakasleak hondakin erradiaktiboen kudeaketa eta arazoa ikuspegi zabal batetik azalduko du, "Hondakin erradiaktiboen erregimen juridiko internazional, komunitario eta espainiarra" hitzaldian. Jarraian, ENRESAren (Hondakin Erradiaktiboen Enpresa Nazionala SA) Administrazioko zuzendari Jorge Lang-Lenton-ek hondakin-mota horien ikuspegi transnazionalaz nahiz Espainiako ikuspegiaz, eta Zentralizatutako Aldi Baterako Biltegiaz ariko da; azkenik, Greenpeace Espainiako zuzendari exekutibo Miren Gutiérrezek arazoak eta izan daitezkeen irtenbideak aztertuko ditu ikuspegi ekologista batetik.