Nafarroako Gobernuak Osasun, Gizarte Politika eta Berdintasuneko Ministerioak bultzatutako proiektu pilotu bat abiaraziko du tratu txarren eragileak berrezteko eta berriz gizarteratzeko. Ekimena doako arreta psikologikoan datza eta, sententzia irmorik izan gabe, kautelazko neurriak ezarrita dituzten –esate baterako, urruntze-agindua- eta beren borondatez parte hartzea erabakitzen duten erasotzaileentzat da.

Proiektua 21.780 eurorekin finantzatuko da, eta horietatik 13.000 Gobernu Zentralak jarriko ditu, eta gainerako 8.780 euroak Nafarroako Gobernuak. Xede horretarako, bi erakundeek lankidetza-hitzarmen bat sinatuko dute; Foru Gobernuak gaur onartu du hitzarmenaren testua.

Gehienez ere 24 plaza eskainiko dira, hamabina pertsonako bi talde terapeutikotan banatuta. Parte-hartzaileak epaitegietatik bideratuko dituzte, eta urtea amaitu baino lehen sartu behar dira programan, jarduerak 2012ko martxoaren 31ra arte luza daitezkeen arren.

Guztira 24 saio egin ahal izango dira, eta bertan gizonezkoen eta emakumezkoen estereotipoekin, bulkaden kontrolarekin, asertibitatearekin eta amorrua gobernatzearekin lotutako gaiak landuko dira. Lehen saioak banakakoak izango dira parte-hartzaileen ebaluazioa egiteko eta gero taldean izango dira.