Nafarroako Gobernuak eta Iruñeko Udalak kolaboratzen duten Nafarroako unibertsitateetako udako ikastaroen hamaikagarren edizioak, marketing pertsonalari eta maitasunari eta bere itxura ezberdinei buruzko monografikoak ditu bere programazioaren barnean.

Lehenengoa ESIC Nafarroa negozio-eskolak eta Tuterako UHUNak antolatzen dute, eta asteartean, irailak 20, izango da bi egoitzetan goiz eta arratsaldeko ordutegian, hurrenez hurren.

"Marketing pertsonala. Enplegua bilatzeko trebeziak" izeneko ikastaroa bi zatitan banatzen da: foroen parte-hartzearen inguruan diharduen on line bidezko ikastaro bat, eta David Rhymes filologoak eta ESICeko e-learning-eko zuzendari teknikoak eta Juan Antonio Carrasco zentro bereko Lanbide Karreren Departamentuaren zuzendariak emandako hitzaldi bat. Bertan, lan-elkarrizketa bati aurre egiteko orduan kontuan hartu beharreko giltzarriak aztertuko dira.

Ikastaroan azpimarratuko da batez ere, norberak nahi duen lanpostua lortzeko orduan marketing pertsonalak zer garrantzi duen; horretarako, lehiatik bereizten jakitea beharrezkoa da, kontratazioa berak enpresarentzat zer onura ekartzen dizkion nabarmenduz eta lan-jarduerari lotutako egoera bakoitzaren komunikazio-gaitasuna bermatuz.

Azkenik, hautaketa-prozesu bati aurre egiteko giltzarri eta aholkuak emango dira; horretarako, konbentzitzen duen komunikazioa aukera garrantzitsuenetako bat dela aipatuko da. Ildo horretatik, ahozko alderdiak nahiz ahozkoak ez direnak nabarmenduko dira, eta elkarrizketa-eredu bat entseatuko da izan daitezkeen galdera eta erantzunen adibideekin.