Nafarroako Gobernuak gehienez ere 367.569 euroko laguntzen deialdi bat onartu du Nafarroako Unibertsitate Publikoko ikertzaileek prestatzeko. Unibertsitate horretan doktorego-tesia egin nahi duten goi-unibertsitario titulatuentzako 19 beka dira, eta beste lau laguntza doktore-titulua 2008ko urtarrilaren 1a baino geroago lortu duten ikertzaileentzat.

1999. urtetik sustatzen ari den deialdi honen helburua, bikoitza da. Alde batetik, doktoretza aurreko esparruan ikerkuntzan hasteko bideari bultzatzea, eta bestetik, doktore-titulua lortu berri duten pertsonen ikerkuntza-gaitasuna sustatzea.

Gogora ekarri behar da, laguntzak gehienez ere 40 hilabetez irauten dutela doktoretza aurreko kasuan, eta bi aldi ezberdinetan: beka fasea, 24 hilabetetako gutxieneko iraupenarekin eta hilean 1.120 euro gordin jasoz; eta kontratuaren fasea, gutxienez sei hilabetetakoa eta gehienez 2 urtetakoa izan behar duena, eta 14 soldatari dagozkion 1.150 euro jasoz hilean.

Doktoretza ondorengo laguntzen kasuan, lan-kontratu bidez gauzatuko dira onuradun eta NUParen artean. Kontratuak gehienez ere urtebete iraungo du eta urtean 15.800 euro gordin jasoko dira (1.200 euroko 14 soldata).

Deialdian parte hartu ahal izateko eskaerak NUPko erregistro orokorrean aurkeztu ahal izango dira, 08:30etik 14:30era, astelehenetik ostiralera, edo Herri Administrazioen Araubide Juridikoaren eta Administrazio Prozedura Erkidearen 30/1992 Legean, azaroaren 26koa, aurreikusitako edozein baliabideen bidez, irailaren 28a bitartean. Laguntza-modalitate bakoitzerako eskatutako baldintzak data horretan bete beharko dira, doktoretza ondorengo laguntzen kasuan salbu; azken kasu horretan, doktorearen betebeharra 2011ko azaroaren 1ean bete beharko da.