Nafarroako Gobernuak baimena emango dio Erronkari Ibarreko Batzordeari Hezkuntza Departamentuaren ardurapean dagoen Julian Gayarre eskola publikoko sukaldea erabiltzeko. Hala, bertan bazkaria prestatu ahal izango dute toki-erakunde horretako haur-hezkuntzako (0-3) zentroko haurrentzat.

Horretarako, Foru Gobernuak baimena eman dio gaur Hezkuntza Departamentuari Erronkari Ibarreko Batzordearekin hitzarmena sinatzeko, baina Nafarroako Gobernuari inolako gasturik ekarri gabe.

Hitzarmenaren testuak jasotzen duenaren arabera, baimena 2011/2012 ikasturterako bakarrik emango da, eta Julian Gayarre eskola publikoko jangela-zerbitzua eskaintzen den azken egunean amaituko da, luzatzeko aukerarik gabe.

Ibarreko Batzordeak ordainduko ditu sukaldearen eta instalazioak erabiltzean behar dituen gela edo tresna guztien garbiketa-gastuak. Era berean, bera arduratuko da sukalderako tresneria edo zerbitzua emateko behar diren bestelako gailu elektrikoak erosi, konpondu edo mantentzeko sor daitezkeen gastuez.

Bestalde, gaur baimendutako hitzarmenaren testuak adierazten duenez, 0tik 3 urtera bitarteko zentrorako menuak prestatzeagatik ez zaio kalterik eragingo Hezkuntza Departamentuak Julian Gayarre eskola publikorako kontratatu duen zerbitzuaren kalitateari. Aparteko edozein gertaerarik izanez gero, erabateko lehentasuna izango du Nafarroako Gobernuaren ardurapean dagoen ikastetxeko ikasleen bazkariak.