Nafarroako Ospitale Guneak (NOG) 2 tipoko diabetesaren inguruan sentsibilizatu eta prebenitzeko erakusketa elkarreragile bat antolatu du bihar hasi eta hurrengo lau asteetan zehar. "Eman ahotsa 2 tipoko Diabetesari" erakusketaren helburua biztanleak gaixotasun horren inguruan informatu, kontzientziatu eta prebenitzea da, arruntena eta gutxien diagnostikatutako eta ezagututako gaixotasuna dena (gaitz hori duen pertsonen % 40ak ez daki gaixo dagoela).

Kanpo-kontsulten Principe de Viana eraikin alboko aparkalekuan dagoen erakusketa honako hauek aurkeztu dute: Ruth Vera Nafarroako Ospitale Gunearen mediku-zuzendariak; Lluis Forga NOGaren Endokrinologia zerbitzuburuak; Ignacio Yurrs Oinarrizko Osasun Laguntzako zuzendariak; eta Daniel Figuerolak Diabetesaren Espainiako Elkartearen Hezkuntza Terapeutikoko Lan Taldeko kideak. Inaugurazio-ekitaldian izan dira ere, Juantxo Ramon Diabetikoen Nafarroako Elkarteko (ANADI) presidentea eta Ricard Casamor, Novartis-en Diabetesaren Arloko mediku-arduraduna.

Osasunaren Mundu Erakundearen (OME) eta Diabetesaren Nazioarteko Federazioaren datuen arabera, patologia hori duten pertsona-kopurua nabarmen igotzen ari da. Gaur egun, 285 milioi pertsonak dute diabetesa.

Espainian aitzindaria den erakusketa honen bidez, bisitariek pankreak nola funtzionatzen duen jakitea bilatzen da (horretarako, tamaina handiko pankrea bat erakusgai jarriko da), eta baita diabetesaren inguruko ezagutzak handitu eta nola prebenitu jakitea ere. Veraren hitzetan, "honako hau bezalako ekimenek biztanleak hezi eta prestatzen laguntzen dute prebalentzia handiko gaixotasun bat prebenitzeko; horregatik, garrantzitsua da era honetako gaitzak hasiera-hasieratik identifikatzea, gaixoari erakusteko nola kontrolatu behar duen bizimodu osasungarriaren ohiturak hartuz".

Yurrs-ek, berriz, prebentzioak duen garrantzia azpimarratu du, eta gogora ekarri du "osasungarriak ez diren bizitza-estiloak zerikusi zuzena izaten duela gaitza agertzeko orduan". Yurrs-en arabera, "Nafarroako Oinarrizko Osasun Laguntzan aspalditik lan egiten da gaixo horiek prebenitzen, jarraitzen eta kontrolatzen; eta ez soilik tratamendu farmakologikoetan, baita osasun-hezkuntzan ere, hain zuzen ere, biztanleak kontzientzia daitezen bizitzeko ohitura osasungarriak zer garrantzitsuak diren. Gaixo-kopuru txiki batek arreta espezializatuaren laguntza behar du. Bi mailen arteko koordinazioa oso ona da, eta eredugarria gure sisteman gaixo kronikoak artatzeko erari dagokionez".