Nafarroako Gobernuak Lanbide Heziketako hiru titulu berriren egitura eta curriculuma onartu du gaur; bi goi-mailakoak dira eta beste erdi-mailakoa, eta energia berriztagarriekin, nekazaritza eta abeltzaintzako produkzioarekin eta sukaldaritzarekin lotuta daude. Tituluetako bi, Energia Berriztagarrien Goi-mailako Teknikaria eta Nekazaritza eta Abeltzaintzako Produkzioko Teknikaria, sortu berriak dira, eta aldiz Sukalde Zuzendaritzako Goi-mailako Teknikariarenak, aurreko bat ordezten du.

Titulu berriek Kualifikazioen eta Lanbide Heziketaren Sistema Nazional berrian ezarritako irizpideak betetzen dituzte. Izan ere, sistema berri horrek barnean hartzen ditu indartzen ari diren ekonomia-sektoreekin lotutako titulu berriak eta LOGSEtik (1990) datozen beste batzuk lan-merkatuaren beharretara egokitzen ditu.

Titulu hauek onartzean, Kualifikazioen eta Lanbide Heziketaren Sistema Nazional berriak gaur egun eskaintzen dituen 79 tituluetatik jada 33 egokitu ditu Nafarroako Gobernuak,. horietako 14 ikasturte honetan. Beraz, 2008. urtetik, 250 lanbide-modulu –ikasgaien baliokideak- baino gehiagoren curriculumak diseinatu dira, eta horiek 1.000 prestakuntza-unitate baino gehiagok osatzen dituzte.

Azpimarratzekoa da, prozesu honetan, Foru Gobernuak energiaren sektoreko kualifikazioak lantzen parte-hartze aktiboa izan duela, lan hori garatzen duten estatuko aditu-taldearen zuzendaritzapean.. Lan horren ondorioz, orain arte Lanbide Heziketako 16 kualifikazio eta 3 titulu diseinatu dira, horietako bat –Energia Berriztagarrien Goi-mailako Teknikariarena- Nafarroan eskaintzen da.

Era berean, Gobernuak Nafarroako produkzio-inguruneari buruzko lurralde-azterketak egin ditu, estatuan ezarritako oinarrizko curriculuma Foru Erkidegoko enpresen sareari egokitzeko xedez.