Nafarroako Gobernuak, bere webgunean, gune zehatz bat eskaintzen die udal nafarrei gaztelaniaz eta euskaraz, eta gune horren bidez, datorren azaroaren 20rako aurreikusita dauden zinegotziak aukeratzeko hauteskunde partzialak egiteko beharrezko formularioak eta txartel-ereduak deskargatu ahal izango dira. Gune horrek, gainera, hauteskunde horien deialdiari, hura zuzentzen duen araudiari eta haren hauteskunde-egutegiari buruzko informazioa eskainiko du, eta dagozkien legezko araudiak ikusteko estekak izango ditu.

Gogoratuko denez, iragan irailaren 21ean Nafarroako Gobernuak hauteskunde partzialen deialdia onartu zien iragan maiatzaren 22ko hauteskundeetan hautagaitzarik aurkeztu ez zuten kontzejuei. Hala, postu hauek bete nahi dira: kontzeju irekiaren erregimenean zuzendu behar diren kontzejuetako lehendakariena, eta lehendakariak nahiz batzordekideek osatutako batzorde baten bidez zuzendu eta administratu behar diren kontzejuetako batzordeena. Zehazki, 43 udalerritako 127 kontzeju dira (9.357 biztanle, guztira) beren ordezkariak hautatzera deitutakoak.