Nafarroako Lehendakari Yolanda Barcina Europar Batasuneko Eskualdeen Batzordearen (Cdr) osoko bilkuran izango da lehen aldiz gaur arratsaldean, erkidegoaren politika eta legeria lantzeko prozesuan tokiko eta eskualdeko erakundeei ahotsa ematen dien kontsulta-organoa.

Aurrez, Barcina Foru Erkidegoaren ordezkari-titular moduan akreditatu da bilkura horretan, eta kargu hori Gobernuaren eledun eta Kulturako, Turismoko eta Erakunde Harremanetako kontseilari Juan Luis Sánchez de Muniáin-i eskuordetu ahal izango dio; azken horrek du ordezko kidearen izaera.

Asteazken honetan, urriak 12, egingo den CdR-ren 92. osoko bilkuraren gai-zerrendako gai nagusia aurrekontu-alorraren azterketa da eta, batez ere, Europako Batzordeak 2014-2020rako berriki proposatutako eskualdeko laguntzen politika.

Gainera, industria-politikaren etorkizunari buruz eztabaidatzea aurreikusita du eta, zehatzago, Europar Batasunak dituen egitasmoak egungo enplegu-mailei eusteko eta sektore ekologikoenak sustatzeko; horrekin batera, Indiaren, hazten ari den herrialde batek hiri-garapen iraunkor bat lortzeko zer erronkei egin behar dien aurre.

Gaurkoan bere lehen lan-saioa izango duen osoko bilkuraren inaugurazio-ekitaldia atzo egin zen "Open days"-en bederatzigarren edizioaren irekiera-ekitaldiarekin, hau da, eskualdeen eta hirien aste europarra, eta Europako Batzordeko lehendakari José Manuel Durao Barroso eta Europako Parlamentuko lehendakari Jerzy Buzek-ek parte hartu zuten bertan.

Ez da ahaztu behar Nafarroak antolatzaile gisa parte hartu duela, Moderna Plana eta Espezializazio Adimentsuaren Estrategiari buruz Open days-en esparruan antolatutako programaren barneko mintegietako batean.