Nafarroako Gobernuak Salgaien Trenbide Korridore Atlantikoari bere laguntza eman dio Valladoliden sinatutako adierazpen publiko batekin, Asturias, Kantabria, Gaztela eta Leon, Galizia eta Euskal Autonomia Erkidegoko gobernu autonomoekin batera.

Gaztela eta Leongo Gobernuak deitutako ekitaldian, Foru Gobernuaren ordezkaria Sustapen eta Etxebizitza Departamentuko Anai Astiz kontseilaria izan da. Adierazpenaren xedea, arku hau Europan Barnako Garraio Sarearen oinarrizko ardatz bihurtzea da, eta Europako Batzordeak urriaren 19an berraztertuko du.

Atlantikoko Korridorea zenbait herrialde zeharkatzen dituen 2.000 kilometro luzeko komunikazio-ardatz bat da eta, horri esker, Atlantikoko portuak eta haren eraginpeko zonaldeko logistika-zentroak elkar lotuko dira. 2010. urtearen amaieran, sei erkidego hauek parte hartzen duten Atlantikoko Korridorea Sustatzeko Plataforma sortu zen Bruselan.

Ondoren, 2011ko apirilaren 13an Atlantikoko Korridorearen Manifestua aurkeztu zen Bruselan. Manifestu horrek Ardatz Atlantikoaren sustapenari laguntzen dio merkantzia garraiatzeko moduen orekari lagunduz; era horretan, tren eta itsaso bidezko garraioa areagotzen da errepidez garraiatzeko moduaren osagarri.

Adierazpena sinatu duten sei eskualdeek Manifestua berariaz onesten dute, eta bertan defendatzen dute Atlantikoko Korridorea Europan Barnako Garraio Sarearen linea nagusi, zentral eta oinarrizkoetan izan behar duela. Gainera, sarearen egokitzapen-inbertsioak babesten dituzte, bai eta portuko terminalekin eta moduen arteko logistika-plataformekin dagoen lotura ere. Gainera, Espainiako Gobernuari eskatzen diote Espainiako Iparraldeko eta Ipar Ekialdeko Abiadura Handiko sarearekin amai dezala, Atlantikoko Korridorearekin koordinatuta lurralde- eta gizarte-mailako orekaren alde egiteko.