Onartutako lehen PSISa Aki Bricolaje España, SL enpresak sustatutako proiektuari dagokio Tuteran brikolajeko merkataritza-establezimendu bat eraikitzeko. Nafarroako Gobernuak iragan martxoaren 14an onartu zuen adierazpena PSIS moduan.

Haren baldintzekin bat etorriz, merkataritzako establezimendu berria A-68aren (lehengo N-232) eskuinaldean kokatuko da, errepide horretako 93. irteeraren parean, A-68ak NA-160rekin egiten duen bidegurutzean, eta azken horretatik sarbidea izanik. Guztira, jardunbideak 11.372 metro koadro inguruko azalera hartzen du eraikin, aparkaleku eta sarbideetarako. Merkataritza-eraikina, berez, guztira eraikitako 3.502 metro koadroko azalerarekin zehazten da, eta erakusketa nahiz salmentako azalera erabilgarria 2.902 metro koadrokoa da.

Bestalde, Taxoaren (Aranguren) onartutako PSISa Decathlon España SAUk sustatutako kiroletako merkataritza-establezimendua da. PSIS adierazpena iragan martxoaren 28an onartu zen.

Establezimendua Ekialdeko ingurabidearen (PA-30) alboan eraikiko da, Osasunaren egungo instalazioen mendebaldean. Lursail hori "Atletico Osasuna Klubaren Kirol Hiria" sektoreko lursail batekin bat dator, kirol eta zerbitzu erabilera globala duena, eta guztira 24.427 m2 hartzen du.

Proiektatutako eraikina, angeluzuzen formakoa, solairu bakarreko nabe bat da, eraikitako 7.017,21 m2-ko azalera du eta saltzeko nahiz erakusteko 6.120,99 m2-ko azalera erabilgarria. Saltokiaren aurrean, 524 ibilgailurentzako 524 aparkalekutako gune bat jarriko da, eta kopuru horretatik 33 ezinduentzako izango da (% 6).

Merkataritzagune berria Artikan

Gainera, Nafarroako Gobernuak gaur erabaki du Euro Depot España SAU-k Artikan sustatutako merkataritza-establezimendu handi bat ezartzeko proposamena PSIS moduan adieraztea. Hura brikolaje eta eraikuntzarako produktu, gai eta materialen txikizkako merkaturatzeko izango da.

Merkataritzako establezimendua Artika (Berriobeitiko udal-mugartea) eta Berriozar udalerrietan jartzea aurreikusita dago, Iruñeko Iparraldeko ingurabidearen alboan (PA-30), eta McDonald’s Berriozar eta Idea Center establezimenduen alboan; ingurabidetik zuzeneko sarbidea izango dute ibilgailuek, eraiki berri den biribilgune batetik.

PSISak eragindako lursailek 12.088 m2-ko azalera hartzen dute, guztira. Aurreikusitako merkataritza-eraikinak, angeluzuzen formakoa, ipar-ekialdeko aldean kokatzen da. Haren aurrean 178 ibilgailurentzako aparkalekua dago, eta kopuru horretatik 12 mugikortasuna murriztuta duten pertsonentzat da (% 6). Gainera, alboko bide guztietan, Iparraldeko ingurabidean izan ezik, aparkatzen uzten da.

Proiektatutako merkataritza-eraikina solairu bakarreko nabe bat da, eraikitako 7.201,92 m2-ko azalera du eta saltzeko nahiz erakusteko 5.755,13 m2-ko azalera erabilgarria. Eraikinaren kanpoko itxitura aurrez fabrikatutako hormigoizko panel leunez osatuta dago eta estalkiak, hiru isurkikoa da eta % 2ko maldarekin, euskarri gisa balioko du 52 panel fotovoltaiko inguru jartzeko.

Planak, hasiera batean, Berriozar eta Berriobeitiko udalen, Iruñerriko Mankomunitatearen eta tartean dauden Nafarroako Gobernuaren zerbitzuen aldeko txostenak ditu. Horren ondorioz, eta Nafarroako Gobernuak PSIS izendapena egin ostean, espedientea jendaurreko prozeduraren mende geratuko da hogeita hamar eguneko epean.