Nafarroako Gobernuak bereak diren 21 higiezin saltzeko baimena eman du gaurko bilkuran. Zehazki, hamaika etxebizitza, zortzi lokal, trasteleku bat eta lehengo konplexu industrial bat dira; haiek guztiak gaur egun ez dira erabiltzen eta ez dago aurreikusita etorkizunean ere erabiliko direnik. Higiezin horiek guztiak Iruñea, Lizarra, Cordovilla (Galar) eta Barañain-en daude, eta enkantean jarriko dira 2012an zehar. Guztira, 16,7 bat milioitako balioa dute

Erabaki hori 2009-2011 Higiezin Planaren barnean sartzen da, eta bere irizpide informatzaileetako bati erantzuten dio, hau da, higiezinen erabileraren arrazionalizazio eta optimizazioari.

Horrekin bat eginez, Nafarroako Gobernuak gaur baimendutako salmentarekin diru-sarrerak lortzeaz gain, higiezin horien mantentze-lanen gastuak aurreztuko ditu. Gainera, higiezin horietan interesa izan dezaketen beste pertsona edo erakundeek erabili ahal izateko aukera eman nahi da.

Enkantean jarriko diren 21 higiezin horietatik, 17 Iruñean daude: Estafeta (5) Jauregiko aldapa (3) eta Compañía (1) kaleetan; zazpi lokal Perdoneko Andre Maria plazan, San Jorge etorbidean eta Estafeta, Jauregiko aldapa, Hilarión Eslava, Lizarra eta Compañía kaleetan; trasteleku bat, berriz, Estafeta kalean.

Beste bi higiezin Lizarran daude, Inmakulada ibilbidean dauden alboko bi etxebizitza eta lokal bat Garcia el Restaurador kalean. Gainera, Barañaingo Tilos plazan dagoen etxebizitza bat ere enkantean jarriko da, eta baita Cordovilla-n (Galar) dagoen 21.500 metro koadro baino gehiagoko industria-nabe bat ere, Zaragozako errepidearen alboan.