Fitur-en Nafarroako eguna ospatzeko ekitaldiak 1:30ean hasi dira, txupinazioa jaurtikiz eta San Ferminetako entzierroaren itxurak eginez Foru Erkidegoaren stand-aren inguruan. Stand-aren barnealdean, Erdi Aroko gaztelu baten antza duena, Nafarroak 2012rako bere turismo-eskaintza aurkeztu du gaur ofizialki.

Lehendakariak nabarmendu du "Gaztelu eta gotorlekuen ibilbide" berria abian jarriko dela aurten; ibilbide horrekin Nafarroako historia eta Foru Erkidegoko 19 txoko ezagutu daitezke gotortutako bere ondarearen bitartez.

Nafarroako Gobernuak ibilbide guztia seinaleztatuko du, argibide-taulak jarriko ditu gaztelu eta gotorleku bakoitzean beren ezaugarriak eta historia azalduz, bisita gidatuak antolatuko ditu eta liburuxkak nahiz sustapen-materiala argitaratuko ditu.

Alde horretatik, Lehendakariak azpimarratu du ibilbideak Nafarroa iparraldetik hegoaldera zeharkatzen laguntzen duela, eta zuzenean Nafarroako historia idatzi den lekuak ezagutzen, garai ezberdinetan bere lege, ondar eta identitateari eusten jakin duen Erreinu baten historia kontatzen duena.

Halaber, Fitur.en "Nafarroak doan hartzen zaitu" kanpainaren edizio berria ere ezagutzera eman da; aurreko edizioetako arrakasta ikusita, 2012. urte honetan ere kanpaina abian jarriko da. Hari esker, deskontuak eskaintzen dira ostatuetan, jatetxeetan eta turismoko ekintzetan ostatu hartzen den bi gaueko 31 euro ordainduz.

Foru Gobernuak kanpaina horri eusteko erabakia hartu du ekimenak zer harrera ona izan zuen iaz ikusita; 125 milioi euroko itzulkina sortu zuen, ia 100.000 turista erakarri ondoren.

Nafarroaren stand-a Fitur-en

Fitur-eko "Nafarroako Erreinua" stand-ak (7C06 stand-a) 500 metro karratu du, Madrilgo Juan Carlos I erakustazokako 7. pabilioian dago eta Erdi Aroko gaztelu baten antza du, alde batetik, Tolosako Navaseko batailaren mendeurrenen eta Nafarroa Gaztelan sartu izanaren oroimenez, eta bestetik, "Gaztelu eta gotorlekuen ibilbidea"-ren aurkezpenagatik.

Era horretan, stand-aren kanpoaldea gotorleku batean bihurtu dute, bertako almenak "Geratuko zara" turismo-kanpainako Erdi Aroko zutoihalekin apainduta daude, eta bertako hormak xake-dekorazio batekin. Bien bitartean, stand-aren barnealdeak gazteluko egongelaren antza du eta hainbat pertsonaiak leihatiletan eta beirateetan daude: errege bat, juglare bat, dama bat…

Foru Erkidegoak aurkezten duen instalazioa zazpi erakusleihok osatzen dute: nagusi batek eta gaien araberako beste seik (ostatuak, gastronomia, turismo kulturala eta Santiago bidea, Nafarroako jaiak, landa-turismoa eta naturako jarduerak). Taberna bat ere badu, laneko aurkezpen eta bileretako gainsolairu bat eta espazio bat 3 dimentsiotako bideo bat proiektatzeko.