Nafarroako Gobernuak 913.552 euroko diru-laguntza ematea erabaki du `A´ klaseko kalifikazio energetikoa duten babes ofizialeko 334 etxebizitza eraikitzeko. Hiru sustapen ezberdinetako etxebizitzak dira; haietako bi Zizur Nagusian daude eta bestea Lezkairun (Iruñea).

Zehazki, 493.818 euro eman zaizkie Promociones Ocec SA eta Gestión Asistencial SA enpresei adostutako prezioan 192 etxebizitza sustatzeagatik Lezkairun (Iruñea); 241.190 euro Construcciones Andía SA enpresari tasatutako prezioan 84 etxebizitza sustatzeagatik Zizur Nagusian; eta 178.544 euro Avanco Inversiones Bravo SL enpresari tasatutako prezioan 58 etxebizitza sustatzeagatik Zizur Nagusian ere. Hiru sustapenek behin-behineko kalifikazioa 2011n lortu zuten.

Diru-laguntza horiek hirigintza eta etxebizitza arloko premiazko neurrien Foru Legean jasota daude. Era horretan, laguntzak 40 eurotakoak dira etxebizitzaren metro karratuko `A´ kalifikazio energetikoa lortzen dutenentzat, 30 eurotakoa `B´ kalifikazio energetikoaren kalifikazioa lortzen dutenentzat eta 20 eurotakoa `C´ dutenentzat.

Lege hori 2009ko ekainean indarrean sartu zenetik, Nafarroako Gobernuak zortzi bat milioi euroko diru-laguntza eman du energia aurrezteko neurriak sartzen, domotika instalatzen edo eraikuntza berriko babes ofizialeko 2.600 etxebizitza baino gehiagoren alokairua sustatzen.