Neurriak eta horien xehetasunak

1. 25 langile baino gutxiagoko enpresentzako laguntza kontratazioan

Nafarroako Gobernuak 4.800 euroraino emango dizkie 25 langile baino gutxiagoko enpresei hiru kolektibotako jendea kontratatuz gero: 30 urtetik beherakoak, 45 urtetik gorakoak eta epe luzeko langabetuak (urtebete baino gehiago).
Laguntzen zenbatekoa Gizarte Segurantzaren kostuaren % 100 izango da lehen urtean mugagabeko kontratuentzat. Diru-laguntza jaso ahal izateko, kontratuaren bidez langileen zerrenda handitu eta gutxienez ere 3 urtez mantendu beharko da.

Horrez gain, Gizarte Segurantzaren kostuaren % 100eko laguntzak emango dira lehen urtean behin-behineko kontratuak behin betiko kontratu bihurtzen badira.
Kasu horretan ez da handitu beharko langileen zerrenda.

Laguntza horiek Gobernu zentralak bi kolektibo hauentzat onetsi dituen laguntzekin batera emango dira: 30 urtetik beherakoak eta 45 urtetik gorakoak, epe luzeko langabetuak direnean.

Neurri horri esker, Gobernuak 2.200 lanpostu sortzea espero du. Horretarako 5 milioi euroko aurrekontua baliatuko da, eta deialdia datorren hilabetean, martxoan, argitaratuko da.

2. Zerga-kenkaria langileei kontratu mugagabea egiteagatik

Nafarroako Gobernuak zerga-abantailak sustatzen jarraituko du langileen kontratuak mugagabeak izatea bultzatzeko. Horretarako, mugagabeko kontratu bakoitzeko, 4.200 euroko zerga-kenkaria aplikatuko da. Kenkaria talde guztiei aplikatuko zaie, baldin eta enpresako langileen zerrenda handitzen badute.

Gainera, Nafarroako Gobernuak 1.500 euroko kenkariak aplikatuko ditu behin-behineko kontratuak behin betiko bihurtzeagatik, langileen zerrendari eutsi eta langile iraunkorren igoera langileen jaitsiera baino handiagoa bada.
Foru Gobernuak enpresa txikiei laguntza berezia emango die (10 milioi euro baino gutxiago fakturatzen dutenak), eta kenkari horiek % 30 handiagoak izango dira 2012an eta 2013an.

Kenkari horiek handiagoak dira Gobernu zentralak estatu osorako ezarri dituenak baino, bai zenbatekoari eta bai hartzaileak izango diren kolektiboei dagokienez.
Foru Gobernuak kalkulatu duenaren arabera, neurri horri esker 2.400 lanpostu sortuko dira. Neurri horretarako eman den aurrekontua 10,3 milioi euro da, eta dagoeneko jasota dago 2012ko aurrekontuan. Neurria aurten, 2012an, sartu da indarrean.

3. 3. Ekintzaileentzako laguntzak jarduera ekonomiko berriak sortzeko

Nafarroako Gobernuak ekintzaileei laguntzeko ildo espezifiko bat sortuko du.
Hala, enpresa-proiektu berrien inbertsioaren % 50 finantzatzeko laguntzak ezarriko dira, 15.000 eurorainokoak. Gehieneko laguntzak 30 urtetik beherako ekintzaileen taldeari emango zaizkio.

Neurri honetarako aurrekontua 2,5 milioi eurokoa da. Nafarroako Gobernuak, laguntzen ildo horren bidez, 150 enpresa berri baino gehiago sortzea espero du. 2012an laguntzak emateko deialdia datorren martxoan plazaratuko da.

4. Gizarteratzeko eta laneratzeko errenta jasotzen dutenak kontratatzeko laguntzak

Gobernuak gaur egun gizarteratzeko eta laneratzeko errenta jasotzen duten pertsonak kontratatzeko diru-laguntzak onetsi ditu.
Diru-laguntzen bi deialdi egingo dira: bata enpresa (publiko eta pribatuak) eta elkarteentzat, eta bestea tokiko erakundeek kontratatu dezaten.

Enpresen eta elkarteen kasuan, diru-laguntzaren zenbatekoa 3.848,40 eurorainokoa izango da oinarrizko errenta jasotzen duen eta kontratatzen den pertsona bakoitzeko (langileen zerrenda handitu beharko du). Diru-laguntza hori 6 hilez oinarrizko errentaren gutxieneko zenbatekoaren baliokidea da. Langilea hitzarmenaren araberako ordu kopuruan oinarrituta kontratatuko da kobratu beharreko zenbatekoraino, hala, enpresak ez du langile horren soldataren kosturik izango eta langileak hitzamen bidez ezarritako baldintzei jarraiki lan egingo du. Enpresari dagokio langilearen Gizarte Segurantzako kostua ordaintzea.

Toki erakundeen kasuan, diru-laguntza 3.848,40 eurorainokoa izango da, hau da, oinarrizko errenta jasotzen duen pertsona bakoitzeko, baina zenbateko horri Gizarte Segurantzako % 100eko kostua gehituko zaio. Kontratua 6 hilekoa izan beharko da eta langilea kobratu beharreko zenbatekoraino dagokion ordu kopuruetan kontratatuko da. Hala, tokiko erakundeak ez du kosturik izango langile horri dagokionez eta langileak legez ezarritako baldintzei jarraiki lan egingo du.

Neurri horren aurrekontua milioi bat eurokoa da eta tokiko erakundeen Gizarte Segurantzako kostua finantzatzeko da. Soldaten zenbatekoa autofinantzatu egingo da, hartzaileek prestazioa jaso ordez enpleguagatiko soldata kobratuko dutelako.

Nafarroako Gobernuak 800 lanpostu sortuko direla aurreikusi du, eta pertsona horiek oinarrizko errenta jasotzeari utziko diote. Diru-laguntzen bi deialdiak datorren martxoan egingo direla aurreikusi da.
Programa honetan parte hartzen duten enpresa edo erakunde partaideek hitzarmena sinatuko dute Nafarroako Gobernuarekin, enpleguaren alde gizarte-konpromisoa hartzeko prest daudela adieraziz.

5. Langabetuen prestakuntzarako programa osagarria

Enpleguaren sustapenaz gain, Nafarroako Gobernuak langabetuak prestatzeko programa osagarri bat abian jartzea onetsi du.
Kualifikatzeko 238 ikastaro eskainiko dira, eta horiek eskaintzen dituzten irakasleen % 50 langabea izango da. Gobernuaren baliabideen bidez gauzatuko da eskaintza, Iturrondo eta Cenifer zentroen bidez, martxotik eta ekainera. Ekainean ere deialdi publiko bat egingo da 2012ko irailetik 2013ko martxora ikastaroak emateko.

Langabetuak kualifikatzeko prestakuntza-programa hau finantzatzeko, Gobernuak 4 milioi euro bideratuko ditu, eta, horren bidez, langabezian dauden 4.600 pertsonari parte hartzeko aukera ematea espero da. Gainera, irakasle gisa lan egiteko 110 postu sortuko ditu.