Irakasleen ordezkariek ere parte hartu dute: Salesianosetako LH ikastetxeko pedagogia-zuzendari Jorge Lanchas-ek eta Virgen del Camino ikastetxeko Ikasketaburu María Ángeles Lecumberri Navascués-ek, bai eta ikasleen ordezkariek ere: Leyre Santos Piquer eta Javier Carmona Arbe-k.

Azaldutako gaiak honako hauek izan dira: Nafarroako Lanbide Heziketako egungo errealitatea; bere egitura eta hezkuntzako eskaintza publiko eta pribatua, bai eta erronka nagusiak ere, irudiaren hobekuntzan eta nazioartekotzean oinarrituta. Talde horretan, energia berriztagarrietan eta osasunean Nafarroak dituen eta estatuan erreferentziazkoak diren bi ikastetxeren eragin berezia aipatu da.

Gainera, Letizia Andreak Foru Erkidegoan garatzen ari diren proiektu aitzindariak ezagutu ahal izan ditu, eta beste autonomia erkidego batzuetan ezar daitezkeenak. Alde batetik, Nafarroako Volkswagen-ekin prestakuntza-hitzarmena; bestetik, "Reyno Gourmet" jatetxeen hitzarmena ostalaritza-adarrean ikasleak prestatzeko eta, azkenik, "Dehesa Milagro" hitzarmena odol garbiko zaldiak hazteko.

Jarraian, proiektu horien ezaugarri nagusiak zehazten dira:

- Prestakuntza-hitzarmena Nafarroako Volkswagen-ekin

Hitzarmenaren helburua da ekoizpen automatikoko industrietan mantentze elektriko-elektronikoan, mekanikoan eta moldeen birdiseinuko mantenuan espezializatzeko ikastaroa sortzea elkarrekin. Prestakuntza planaren diseinua eta irakasleria mistoak dira, hau da, Volkswagen-enak eta Hezkuntza Sailarenak. 5 milioi euroko aurrekontuarekin, enpresak espresuki horretarako eraiki eta hornitu dituen instalazio batzuetan garatuko dituzte eskolak. Ekimen honetan Lanbide Heziketako hiru ikastetxek hartzen dute parte. Ikastaroan 18 ikaslek izango dute tokia eta urrian hasiko dela aurreikusten da.

- Hitzarmena "Restaurantes del Reyno" Elkartearekin

Lankidetza-proiektu integral honen helburua da Burlatako Ibaialde BHI-ko sukaldaritzako Zikloko ikasleen prestakuntza teoriko-praktikoa hobetzea. Ekimen honetan 13 jatetxek parte hartzen dute: Maher, Alhambra, Beti Jai, Josetxo, Túbal, Rodero, Enekorri, Europa, El Peregrino, el Molino de Urdaniz, Treintaytrés, La cocina de Alex Mújica eta Castillo de Gorraiz jatetxeek, hain zuzen ere. Hitzarmenak honakoak hartzen ditu barne: ikasleen prestakuntza praktikoa jatetxeetan (astean egun batean), chef-en eskolen programazioa, Jatetxe Zerbitzuen Zuzendaritzako Goi Mailako Prestakuntza Zikloaren curriculumaren baterako diseinua eta espezializaziorako ikastaro bat, eta Ibaialde BHI-ko etengabeko prestakuntzako ikastaroen eskaintza.

- Hitzarmena "Dehesa Milagro"-rekin, odol garbiko zaldiak hazteko

Hitzarmen honi esker, Zaldizko Jardueren Erdi Mailako Prestakuntza Zikloa izeneko Lanbide Heziketako ziklo berri bat jarriko da Milagro udalerrian. Eskolak odol garbiko zaldi ingelesak hazten dituen "Dehesa Milagro"ren instalazioetan izango dira; horrela, bi helburu beteko ditu: gazteei prestakuntzarako aukera eskaintzea eta enpresak duen langile kalifikatuen beharrei erantzun egokia ematea. Curriculuma Erresuma Batuan ere baliozkoa izango da.

Behin lan-jardunaldia amaituta, Asturiaseko eta Vianako Printzesak eskolen garapena ezagutzeko aukera izan du, honako lanbide-familia motetan:

-Mekanizazio-fabrikazioa. Ikasgela honetan ordenadore bidez gidatutako tornu baten pieza baten fabrikazioa ikusi ahal izan du. "Virgen del Camino" Ikastegi Bateratu Politeknikoko Fabrikazio Mekaniko Mekanizatuko hamar ikaslek osatzen dute taldea, Narciso Marín eta Pablo Esquiroz direlarik eskola horietako irakasleak.

-Hastapeneko Lanbide Kalifikazioko eta Kalifikazio Bereziko Programa. Ezintasunak dituzten pertsonei zuzendutako programa da eta Nafarroako Lanbide Heziketako Osasun-Teknikoko Sektoreko Ikastegi Bateratuan ematen dituzte eskolak. Zazpi ikasle eta Miguel San Julián Resano eta Lourdes Fernández Ugarte irakasleak egon dira ikasgelan eta biriketako bizkortzeari buruzko erakustaldi bat egin dute.