2011ko urtarrila eta abendua artean, Nafarroan 23.060 lan-istripu izan zen; aurreko urtean 23.885 izan ziren, hau da, % 3,5 jaitsi da, Nafarroako Lan Osasuneko Institutuak egindako behin-behineko txostenaren arabera. Heriotzak eragin zituen istripu-kopurua ere 14tik 10era jaitsi zen 2011an.

Istripu guztietatik, 7.716 bajarekin izan ziren (2010ean baino % 7 gutxiago; urte hartan 8.337 izan ziren), 769 (904 aurreko urtean) "in itinere" izan ziren, hau da, lanetik etxerako bidean edo alderantziz, eta 10 heriotza izan ziren ezbeharrez: 9 bajarekin (6 eraikuntza-sektorean eta 3 zerbitzutan) eta bat in itinere.

Jaitsiera jarduera ekonomikoko sektore guztietan gertatu zen, arinetan eta heriotzetan (823 eta 4, hurrenez hurren), nahiz eta larrialdietan igoera txiki bat ikusten den (81; 2010ean 79 izan ziren).

Istripu horietarako gertakari-indizea ere (mila langileko istripuak) % 6,8an jaitsi da (35,8; 2010ean 38,4 ziren). Heriotza eragin duten indizearen jaitsiera garrantzitsua ere nabarmendu behar da (% 17,9an), nahiz eta larrietan igoera txiki bat izan (% 5). Jaitsiera sektore guztietan gertatu da, aldaketa txiki batzuekin, aipagarriena nekazaritzakoa izanik (% 15,7); atzetik datoz zerbitzuak (% 7,2), industria (% 5,7) eta eraikuntza (% 1,6).

Ezbehar-kopuruan jaitsiera handienak izan zituzten jarduera ekonomikoen artean nabarmentzen dira: higiezinen jarduerak (46,1etik 14,5 istriputara mila langileko); publizitatea eta merkatuen azterketak (21,8tik 9,9ra); ordenagailuen konponketa, norberaren gauzak eta etxean erabiltzeko gaiak (57,7tik 30,2ra); edo posta eta postetxetako jarduerak (69,4tik 49,4ra). Aldiz, ezbehar-mailan igoera handiena izan dute: ehunen industrian (31tik 51,8ra); larruaren eta oinetakoen industrian (29tik 57,9ra); hondakinen bilketan, tratamenduan eta kentzean; balorizazioan (54,3tik 71,2ra); eta aire-garraioan, batere ez izatetik 22,6ra pasa da.