Hezkuntza Kontseilari Jose Iribas Sanchez de Boado jauna izan da buru gaur Nafarroako Jauregian egin den Euskararen Nafar Kontseiluaren bileran. Bertan, udal-mailan euskara erabiltzeko eta sustatzeko laguntzak arautuko dituen foru-dekretuaren proiektua ezagutu dute, besteak beste, aholku-emailea eta partaidetzazkoa den erakunde honetako kideek.

Proiektu honen bidez Nafarroako Gobernuak aldatu nahi du zuzeneko diru-laguntzen egungo erregimena, Foru Gobernuaren erabaki zehatz bidez ematen dena eta beste edozein interesatuk laguntzak jasotzeko aukera baztertzen duena, deialdi publiko batera pasatzeko; hala, nahi duten tokiko erakunde guztiek izango dute aukera lehiaketan parte hartzeko.

Bestalde, Euskararen Nafar Kontseiluak Nafarroako Gobernuaren eta Eusko Jaurlaritzaren arteko euskararen esparruko lankidetza-protokoloa ezagutu du gaur. Dokumentu honen bidez gai honetan bi administrazioen arteko lankidetza bultzatzen da, eta bertan argi eta garbi adieraziko da Nafarroako Foru Komunitatea eta Euskal Autonomia Erkidegoa bereizitako bi erakunde direla eta administrazio publiko desberdinak dituztela.

Protokolo hau aplikatzeko esparru desberdinen artean azpimarratzekoa da, lehenik, helduentzako euskararen irakaskuntza. Era berean jasotzen du bi administrazioen artean euskararen gaitasun-mailak ebaluatzeko eta egiaztatzeko proben eta sistemen diseinuan lankidetza izatea, erreferentzia gisa Europako esparru komuna hartuta, eta bi administrazioen artean batak besteak emandako tituluak onartzea.